തളിപ്പറമ്പ്: വിളയാങ്കോട്ടെ ചുമട്ടുതൊഴിലാളി കടന്നപ്പള്ളി പുത്തൂര്‍കുന്നിലെ ജസ്റ്റിന്‍ അഗസ്റ്റിനെ മര്‍ദിച്ചുവെന്ന പരാതിയില്‍ ആരോപണവിധേയനായ പൊലിസുകാരനെ എ.ആര്‍ ക്യാംപിലേക്ക് തിരിച്ചയച്ചു. ക്യാംപിലെ സാധാരണ പൊലിസുകാരനായ ഇയാള്‍ പരിയാരം സ്റ്റേഷനില്‍ ഡ്രൈവറായി ജോലി ചെയ്തുവരികയാണ്. ഇയാളോട് നിര്‍ബന്ധിത അവധിയില്‍ പ്രവേശിക്കാന്‍ ജില്ലാ പൊലിസ് മേധാവി നിര്‍ദേശം നല്‍കിയതായും സൂചനയുണ്ട്. എസ്.പി ആവശ്യപ്പെട്ടതനുസരിച്ച് തളിപ്പറമ്പ് ഡിവൈ.എസ്.പി സി അരവിന്ദാക്ഷന്‍ സംഭവം അന്വേഷിച്ച് റിപ്പോര്‍ട്ട് ശനിയാഴ്ച തന്നെ സമര്‍പ്പിച്ചിരുന്നു. റിപ്പോര്‍ട്ടില്‍ പൊലിസുകാരന്റെ ഭാഗത്തുനിന്നു ഗുരുതരമായ വീഴ്ച ഉണ്ടായെന്നും   എസ്.ഐക്കെതിരെ കാര്യമായ ആരോപണങ്ങളില്ല എന്നുമാണ് സൂചന. റിപ്പോര്‍ട്ട് പരിശോധിച്ച് തുടര്‍നടപടികള്‍ സ്വീകരിക്കും.