കൂത്തുപറമ്പ്: പിണറായി വെണ്ടുട്ടായി നിവാസികള്‍ക്ക് ഇനി പുലി ഭീതിയില്ല.
 പുലിയെ കണ്ടെന്ന അഭ്യൂഹത്തെ തുടര്‍ന്ന് ഈയിടെ പ്രദേശത്ത് വനം വകുപ്പധികൃതര്‍ സ്ഥാപിച്ച കാമറാ ട്രാപ്പ്  ഇന്നലെ പരിശോധിച്ചപ്പോള്‍ പുലിയുടേയോ പുലിയോട് സാദൃശ്യമുള്ള ജീവിയുടേയോ ചിത്രം പതിഞ്ഞതായി കണ്ടെത്താന്‍ സാധിച്ചില്ല.
ഇതാണ് പ്രദേശവാസികളുടെ പുലി ഭീതി ഒഴിയാന്‍ കാരണം.കഴിഞ്ഞ മാസം 29നാണ് വെണ്ടുട്ടായിയില്‍ പുലിയോട് സാമ്യമുള്ള ജീവിയെ കണ്ടെത്തിയത്.
പ്രദേശത്തെ ഒരു വീട്ടിലെ സി.സി.ടി.വി ക്യാമറയിലാണ് ജീവിയുടെ ചിത്രം പതിഞ്ഞത്. ഇതേ തുടര്‍ന്ന് പ്രദേശവാസികളില്‍ ഭീതി ഉടലെടുത്തതോടെ വനം വകുപ്പധികൃതര്‍ രണ്ട് ഇടങ്ങളിലായി ക്യാമറകള്‍ സ്ഥാപിക്കുകയായിരുന്നു. ഈ ക്യാമറകളിലെ ദൃശ്യങ്ങളാണ് ഇന്നലെ രാവിലെ ഉദ്യോഗസ്ഥര്‍ പരിശോധിച്ചത്.എന്നാല്‍ ക്യാമറയില്‍ അസ്വാഭാവികമായ ദൃശ്യങ്ങളൊന്നും ഉണ്ടാകാത്തതിനാല്‍ പ്രദേശവാസികളുടെ പുലി ഭീതിയും ഒഴിവായി.