കൊച്ചി: ദിലീപിനെ താരസംഘടനയായ 'അമ്മ'യില്‍ തിരിച്ചെടുത്ത നടപടിക്കെതിരേ കടുത്ത വിമര്‍ശനവുമായി എസ്.എഫ്.ഐ. ദേശീയപ്രസിഡന്റ് വി.പി സാനു. സര്‍വകലാശാല, കോളജ് യൂണിയനുകളുടെ പരിപാടികള്‍ക്ക് താരങ്ങളെ ക്ഷണിക്കരുതെന്ന ആഹ്വാനമാണ് ദേശീയ പ്രസിഡന്റ് സമൂഹമാധ്യമത്തിലൂടെ നടത്തിയത്. 

സഹപ്രവര്‍ത്തകക്കെതിരേ ഹീനമായ കുറ്റകൃത്യം നടത്തിയെന്നപേരില്‍ അന്വേഷണം നേരിടുന്ന വ്യക്തിയെ തിരികെയെടുത്ത് സംഘടന പുലര്‍ത്തിയ 'നീതിബോധ'ത്തിന്റെ പേര് 'പാട്രിയാര്‍ക്കി' എന്നാണെന്നും സാനു പറയുന്നു.
സംഘടനയില്‍ നിന്ന് രാജിവച്ച നാലു നടിമാരെ അഭിവാദ്യം ചെയ്യുന്നുവെന്ന് പറഞ്ഞ അദ്ദേഹം താരാരാധനയെക്കാളുപരിയായി സിനിമയുടെ പ്രമേയവും രാഷ്ട്രീയവും അംഗീകരിക്കപ്പെടുന്ന തരത്തിലേക്ക് കേരളസമൂഹം മാറിവരുമെന്നും കൂട്ടിച്ചേര്‍ത്തു.