ബാങ്കോക്ക്: അഞ്ചുവര്‍ഷത്തെ പട്ടാളഭരണത്തിനു ശേഷം തായ്‌ലന്‍ഡില്‍ ആദ്യമായി നടന്ന തെരഞ്ഞെടുപ്പിന്റെ ഫലം സംബന്ധിച്ച് അവ്യക്തത.

ഞായറാഴ്ചയാണ് വോട്ടെടുപ്പ് നടന്നത്. വോട്ടെടുപ്പ് കഴിഞ്ഞതിനു പിന്നാലെ എണ്ണലും തുടങ്ങി.
തായ് പാര്‍ലമെന്റിന്റെ അധോസഭയായ ഹൗസ് ഓഫ് റപ്രസന്റെറ്റിവിലെ 500 സീറ്റുകളില്‍ 350 സീറ്റുകളിലേക്കാണ് വോട്ടെടുപ്പ് നടന്നത്. ഇതില്‍ ഫ്യൂ തായ് പാര്‍ട്ടിക്ക് 138 സീറ്റുകള്‍ ലഭിച്ചു.

പട്ടാള പിന്തുണയുള്ള ഫലാങ് പ്രചാരത്ത് പാര്‍ട്ടിക്ക് 97 സീറ്റുകളും ലഭിച്ചു. ഭുംജൈ തായ് പാര്‍ട്ടി (39), ഡെമോക്രാറ്റ് പാര്‍ട്ടി (33), ഫ്യൂച്ചര്‍ ഫോര്‍വേഡ് പാര്‍ട്ടി (30), പ്രജാ ചാര്‍ട്ട് പാര്‍ട്ടി (7), ചര്‍ത്തായ് പട്ടാന പാര്‍ട്ടി (6) തുടങ്ങിയ കക്ഷികളാണ് പിന്നിലുള്ളത്.
ഹൗസ് ഓഫ് റപ്രസന്റെറ്റിവില്‍ 500 സീറ്റും ഉപരിസഭയായ സെനറ്റില്‍ 250 അംഗങ്ങളുമാണുള്ളത്. ഇതില്‍ 376 സീറ്റ് ആണ് കേവലഭൂരിപക്ഷം. ഹൗസ് ഓഫ് റപ്രസന്റെറ്റിവിലെ 500 പേരെയും വോട്ടെടുപ്പിലൂടെയാണ് തെരഞ്ഞെടുക്കുന്നത്. സെനറ്റിലെ 250 പേര്‍ നാമനിര്‍ദേശം വഴിയാണ് അംഗങ്ങളാവുന്നത്.

ജനകീയ സര്‍ക്കാരിന് അധികാരം കൈമാറുന്നതിന് സൈന്യം തയാറാക്കിയ ഭരണ പരിഷ്‌കാരപ്രകാരമാണ് തെരഞ്ഞെടുപ്പ് നടന്നത്.