മലപ്പുറം:  വോട്ടെണ്ണലിന്റെ ഒരോ നിമിഷവും വ്യക്തമായ മുന്‍തൂക്കംകാണിച്ച് യു.ഡി.എഫ് വിജയം ഒത്തൊരുമയുടേത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിലുണ്ടായ ഭിന്നതകളെ തുടര്‍ന്ന് മുന്നണിയിലുണ്ടായ പ്രശ്‌നങ്ങള്‍ പൂര്‍ണമായും തീര്‍ക്കുന്നതിനു മുമ്പാണ് കഴിഞ്ഞ് നിയമസഭ തെരഞ്ഞെടുപ്പ് നടന്നെതെങ്കില്‍ ഇതിന്റെ യാതൊരു പ്രതിഫലനവും ഇല്ലാതെയാണ് ലോക്‌സഭ തെരഞ്ഞെടുപ്പില്‍ കുഞ്ഞാലിക്കുട്ടി ജയിച്ചത്.

ലീഗ് നേതാക്കളേക്കാള്‍ ആവേശത്തില്‍ കോണ്‍ഗ്രസ് നേതാക്കളും കോണ്‍ഗ്രസ് നേതാക്കളേക്കാള്‍ ആവേശത്തില്‍ മുസ്‌ലിം ലീഗ് നേതാക്കളും തെരഞ്ഞെടുപ്പ് പ്രചരണത്തിനിറങ്ങിയപ്പോള്‍ മലപ്പുറത്ത് ഐക്യജനാധിപത്യ മുന്നണി പ്രകടിപ്പിച്ചത് ഒരുകാലത്തും കാണത്ത ശക്തമായ മുന്നണിയുടെ കെട്ടുറപ്പ്.

യുഡിഎഫിന്റെ സിറ്റിങ് സീറ്റായ മലപ്പുറത്ത് ഇ.അഹമ്മദ് അന്തരിച്ചതിനെ തുടര്‍ന്നാണ് ഉപതെരഞ്ഞെടുപ്പ് വേണ്ടിവന്നത്. ഉപതെരഞ്ഞെടുപ്പില്‍ ലീഗ് ശക്തമായ വിജയം നേടുമെന്ന് ആദ്യഘട്ടത്തില്‍ പ്രചരിച്ചിരുന്നെങ്കിലും വോട്ടിങ് ശതമാനം വേണ്ടത്ര ഉയരാതിരുന്നത് യു.ഡി.എഫ് ക്യാംപുകളെ ആശങ്കയിലാക്കിയിരുന്നു. തെരഞ്ഞെടുപ്പ് ഫലം വന്നതോടെ ഇതെല്ലാം അപ്രസക്തമാവുകയായിരുന്നു.

ഓരോ റൗണ്ട് വോട്ടെണ്ണുമ്പോഴും കുഞ്ഞാലിക്കുട്ടി ലീഡ് ഉയര്‍ത്തുന്ന കാഴ്ചയാണ് കണ്ടത്. എല്‍ഡിഎഫ് ലീഡ് ലഭിക്കുമെന്ന് കരുതിയ സ്ഥലങ്ങളില്‍ പോലും വേണ്ടത്ര വോട്ട് ലഭിക്കാതായതോടെ മുസ്‌ലിം ലീഗിന്റെ ഭൂരിപക്ഷ വര്‍ധന ആധികാരികമാവുകയായിരുന്നു.

ദേശീയ രാഷ്ട്രീയത്തിനൊപ്പം സംസ്ഥാന സര്‍ക്കാരിന്റെ ഭരണ പരാജയവും മുഖ്യവിഷയങ്ങളാക്കി ശക്തമായ പ്രചാരണമാണ് മലപ്പുറത്തു നടന്നത്. പ്രചാരണം അവസാന ലാപ്പിലെത്തിയതോടെ മലപ്പുറത്തേക്ക് നേതാക്കളുടെ പട തന്നെ എത്തി. എല്‍.ഡി.എഫ് സ്ഥാനാര്‍ഥിക്ക് വേണ്ടി മന്ത്രിമാരടക്കമുള്ളവരും മണ്ഡലത്തിലെത്തി. ദേശീയ, സംസ്ഥാന നേതാക്കളെ രംഗത്തിറക്കിയാണ് ബി.ജെ.പി പ്രചാരണം നടത്തിയതെങ്കിലും ഇത് യാതൊരു തരത്തിലും പ്രതിഫലിച്ചില്ല എന്നതാണ് തെരഞ്ഞെടുപ്പ്് ഫലം വ്യക്തമാക്കുന്നത്.

പി.കെ. കുഞ്ഞാലിക്കുട്ടിയെ സ്ഥാനാര്‍ഥിയായി പ്രഖ്യാപിച്ചതു മുതല്‍ മലപ്പുറത്തേക്ക് കോണ്‍ഗ്രസ് നേതാക്കളുടെ ഒഴുക്കായിരുന്നു. ഉമ്മന്‍ചാണ്ടി, രമേശ് ചെന്നിത്തല, എം.എം. ഹസന്‍, കെ. ശങ്കരനാരായണന്‍, പി.പി.
തങ്കച്ചന്‍, മുല്ലപ്പള്ളി രാമചന്ദ്രന്‍, ബെന്നി ബെഹനാന്‍, എം.ഐ. ഷാനവാസ്, കെ. മുരളീധരന്‍, ശശി തരൂര്‍ തുടങ്ങിയവര്‍ മലപ്പുറത്തെത്തി.

ജില്ലയിലെ മുതിര്‍ന്ന കോണ്‍ഗ്രസ് നേതാവായ ആര്യാടന്‍ മുഹമ്മദും പ്രചരണ രംഗത്ത് സജീവമായി. ദേശീയ നേതാക്കളായ ജയറാം രമേശ്, എ.കെ. ആന്റണി എന്നിവരും മലപ്പുറത്ത് പ്രചാരണത്തില്‍ മുന്നില്‍നിന്നു. യു.ഡി.എഫിന് പുറത്തുള്ള കേരളാ കോണ്‍ഗ്രസ് നേതാവ് കെ.എം മാണിയും കുഞ്ഞാലിക്കുട്ടിക്ക് വോട്ടഭ്യാര്‍ഥിക്കാന്‍ മലപ്പുറത്തെത്തിയിരുന്നു. ഇതെല്ലാം വോട്ട് വര്‍ധനയില്‍ പ്രതിഫലിച്ചു.

എല്‍.ഡി.എഫ് സ്ഥാനാര്‍ഥിക്ക് വേണ്ടി പ്രചാരണം നടത്താന്‍ മുഖ്യമന്ത്രി പിണറായി വിജയനും വി.എസ് അച്യുതാനന്ദനും എത്തി. വിദ്യാഭ്യാസ മന്ത്രി ഒഴികെയുള്ള സംസ്ഥാന മന്ത്രിമാരെ രംഗത്തിറക്കിയെങ്കിലും യാതൊരു ചലനവും ഉണ്ടായില്ലെന്നാണ് വ്യക്തമാവുന്നത്.