ന്യൂഡല്‍ഹി: ഇന്ത്യാ-ചൈന അതിര്‍ത്തിയില്‍ ഇരു രാജ്യങ്ങളും തമ്മില്‍ നടക്കുന്ന പ്രശ്‌നം സമാധാനപരമായി പരിഹരിക്കാന്‍ തീരുമാനിച്ചതായി ഇന്ത്യ. കഴിഞ്ഞ ദിവസം ലഡാക്കില്‍ ഇരുരാജ്യങ്ങളും സൈനികതല ചര്‍ച്ച നടത്തിയതിനു പിന്നാലെയാണ് വിദേശകാര്യ മന്ത്രാലയം ഇക്കാര്യം വ്യക്തമാക്കിയത്.
ഇരു രാജ്യങ്ങളും തമ്മില്‍ നിലനില്‍ക്കുന്ന വിവിധ കരാറുകളനുസരിച്ച് പ്രശ്‌നം സമാധാനപരമായി പരിഹരിക്കാന്‍ ഇന്ത്യയും ചൈനയും തീരുമാനിച്ചെന്നാണ് വിദേശകാര്യ മന്ത്രാലയം അറിയിച്ചത്. കഴിഞ്ഞ ദിവസം നടന്ന സൈനികതല ചര്‍ച്ച ആശാവഹമായിരുന്നെന്നാണ് ഇന്ത്യയുടെ പ്രതികരണം. എന്നാല്‍, ചര്‍ച്ചയില്‍ ഏതെങ്കിലും വിഷയത്തില്‍ അന്തിമ തീരുമാനമുണ്ടായതായി റിപ്പോര്‍ട്ടില്ല. നാലു മണിക്കൂറിലേറെ നീണ്ട ചര്‍ച്ചയക്കു ശേഷം, ഇത് ആദ്യഘട്ടമാണെന്നും ചര്‍ച്ചകള്‍ തുടരുമെന്നുമായിരുന്നു സൈന്യം വ്യക്തമാക്കിയിരുന്നത്. രാവിലെ 8.30ന് തുടങ്ങാന്‍ നിശ്ചയിച്ചിരുന്ന സൈനികതല ചര്‍ച്ച മൂന്നു മണിക്കൂര്‍ വൈകിയാണ് തുടങ്ങിയിരുന്നത്.
നേരത്തെ, ലഡാക്കില്‍ ഇന്ത്യന്‍ സൈനികരും ചൈനീസ് സൈനികരും തമ്മില്‍ ഏറ്റുമുട്ടുകയും നിരവധി പേര്‍ക്കു പരുക്കേല്‍ക്കുകയും ചെയ്തിരുന്നു. ഇതിനു പിന്നാലെ അതിര്‍ത്തിയില്‍ ഇരു വിഭാഗവും സൈനിക, ആയുധ ശേഷി വര്‍ധിപ്പിക്കുകയും ചെയ്തു. എന്നാല്‍, എന്താണ് യഥാര്‍ഥ പ്രശ്‌നമെന്നു വ്യക്തമാക്കാന്‍ കേന്ദ്രസര്‍ക്കാര്‍ തയാറായിരുന്നില്ല. പ്രശ്‌നമെന്തെന്ന് ജനങ്ങളെ അറിയിക്കണമെന്ന് രാഹുല്‍ ഗാന്ധി അടക്കമുള്ള പ്രതിപക്ഷ നേതാക്കള്‍ ആവശ്യപ്പെട്ടിരുന്നു.
സംഘര്‍ഷം ഒഴിവാക്കണമെന്ന് യു.എന്നും ആവശ്യപ്പെട്ടു. എന്നാല്‍, പ്രശ്‌നത്തില്‍ മധ്യസ്ഥത വഹിക്കാമെന്ന അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ വാഗ്ദാനം ഇന്ത്യയും ചൈനയും തള്ളുകയും നേരിട്ട് ചര്‍ച്ച നടത്തി പരിഹരിക്കുമെന്നു വ്യക്തമാക്കുകയും ചെയ്തിരുന്നു.