ദീര്‍ഘദൂര ട്രെയിനുകളില്‍ പലതും മലപ്പുറം ജില്ലയിലെ ഒറ്റ സ്റ്റേഷനിലും നിര്‍ത്താത്തിലുള്ള ജനരോഷം നീറിപ്പുകയാന്‍ തുടങ്ങിയിട്ടു കാലം കുറച്ചായി. അതിനിടയിലിതാ എരിതീയില്‍ എണ്ണയൊഴിക്കുന്ന തരത്തില്‍ പുതിയ രണ്ടു ട്രെയിനുകള്‍ കൂടി ജില്ലയിലെങ്ങും നിര്‍ത്താതെ ഈ മാസം അഞ്ചു മുതല്‍ കൂകിപ്പായാന്‍ പോകുന്നു. തിരുനല്‍വേലി-ഗാന്ധിധാം, ഗാന്ധിധാം-തിരുനല്‍വേലി എക്‌സ്പ്രസുകളാണ് മലപ്പുറത്തെ അപമാനിക്കുന്ന ട്രെയിന്‍പട്ടികയില്‍ ഉള്‍പ്പെടാന്‍ പോകുന്നത്.

മുപ്പതോളം ട്രെയിനുകള്‍ ഇപ്പോള്‍ത്തന്നെ ജില്ലയില്‍ നിര്‍ത്താതെ ഓടുന്നുണ്ട്. സാധാരണയാത്രക്കാര്‍ക്കുവേണ്ടി ആരംഭിച്ച അന്ത്യോദയ എക്‌സ്പ്രസ് മലപ്പുറമൊഴികെ റെയില്‍പ്പാതയുള്ള എല്ലാ ജില്ലകളിലും നിര്‍ത്തുന്നുണ്ട്. റിസര്‍വേഷനില്ലാതെ യാത്ര ചെയ്യാമെന്നതാണ് ഇതിന്റെ സവിശേഷത. ആ ആനുകൂല്യം മലപ്പുറം ജില്ലകാര്‍ക്കു മാത്രം നിഷേധിച്ചിരിക്കുകയാണു കേന്ദ്രസര്‍ക്കാര്‍.
ജില്ലയിലെ കേന്ദ്ര സ്ഥാപനങ്ങള്‍ക്കു നേരേ കേന്ദ്രസര്‍ക്കാര്‍ ചിറ്റമ്മനയം സ്വീകരിച്ചു വരുന്നതിന്റെ ഭാഗമാണ് ഇതും. കരിപ്പൂര്‍ വിമാനത്താവളത്തിന്റെ ചിറകരിയാന്‍ അണിയറയില്‍ ശ്രമം തുടങ്ങിയിട്ട് കാലം ഏറെയായി. വിമാനത്താവളം ഇന്ന് വികസന മുരടിപ്പിലാണ്. അന്ത്യോദയ എക്‌സ്പ്രസിന് ഏറ്റവുമൊടുവില്‍ കാസര്‍കോട്ടും ആലപ്പുഴയിലും സ്റ്റോപ്പ് അനുവദിച്ചപ്പോള്‍ സ്വാഭാവികമായും തിരൂരിലും സ്റ്റോപ്പ് അനുവദിക്കുമെന്നു മലപ്പുറത്തുകാര്‍ പ്രതീക്ഷിച്ചിരുന്നു.

ജനസംഖ്യാനുപാതികമായി യാത്രക്കാരുടെ എണ്ണവും വരുമാന തോതുമനുസരിച്ചുമാണു ട്രെയിനുകള്‍ക്കു സ്റ്റോപ്പ് അനുവദിക്കുക. ഈ രണ്ടു കാര്യത്തിലും മലപ്പുറം ഇതര ജില്ലകളേക്കാള്‍ മുന്നിലാണ്. പാലക്കാട് 29 ലക്ഷവും തൃശൂരില്‍ 32 ലക്ഷവും ഏറണാകുളത്ത് 34 ലക്ഷവുമാണു ജനസംഖ്യ. ഇവിടങ്ങളിലൊക്കെയും രണ്ടു സ്റ്റേഷനുകളില്‍ വരെ പല ദീര്‍ഘദൂര ട്രെയിനുകള്‍ക്കും സ്റ്റോപ്പുണ്ട്.
അതേസമയം, 45 ലക്ഷം ജനസംഖ്യയുള്ള മലപ്പുറം ജില്ലയ്ക്ക് ഈ പരിഗണനയില്ല. ദീര്‍ഘദൂര ട്രെയിനുകളുടെ ടിക്കറ്റ് നിരക്കുകളിലുള്ള വരുമാനം പരിശോധിച്ചാലും മലപ്പുറം ജില്ലയാണ് റെയില്‍വേയ്ക്കു കൂടുതല്‍ വരുമാനമുണ്ടാക്കി കൊടുക്കുന്നത്. ഇതര ജില്ലകളെ അപേക്ഷിച്ച് ഇരട്ടി വരുമാനം തിരൂരില്‍നിന്നു ടിക്കറ്റ് വില്‍പ്പനയില്‍ ലഭിക്കുന്നുണ്ട്.

ചരക്കു കയറ്റുമതി-ഇറക്കുമതിയിലും ഏറ്റവും കൂടുതല്‍ വരുമാനം തിരൂരില്‍ നിന്നു തന്നെ. വെറ്റില പല ഭാഗങ്ങളിലേയ്ക്ക് അയക്കുന്നതും ഗള്‍ഫ് ഉല്‍പന്നങ്ങളും മത്സ്യവും വന്‍തോതില്‍ ഇറക്കുമതി ചെയ്യുന്നതും തിരൂരിലാണ്. എന്നിട്ടും അവഗണന തുടരുന്നതിന് എന്തു ന്യായീകരണമാണു റെയില്‍വേ മന്ത്രി പിയൂഷ് ഗോയലിനു നിരത്താനുള്ളത്. സ്റ്റോപ്പുള്ള ചുരുക്കം ചില ദീര്‍ഘദൂര ട്രെയിനുകള്‍ക്കാകട്ടെ തിരൂരില്‍ റിസര്‍വേഷന്‍ സൗകര്യവുമില്ല. അതിനായി ഷൊര്‍ണൂരിലോ കോഴിക്കോട്ടോ പോകണം.

കേരളത്തെ പൊതുവായി അവഗണിക്കുന്നതിനൊപ്പമാണ് മലപ്പുറം ജില്ലയെ പ്രത്യേകമായി അവഗണനയുടെ അഗണ്യകോടിയില്‍ തള്ളുന്നത്. കഞ്ചിക്കോട് കോച്ച് ഫാക്ടറി ഉപേക്ഷിക്കുവാന്‍ കേന്ദ്രസര്‍ക്കാര്‍ തയാറെടുത്തുകൊണ്ടിരിക്കുന്നതു കേരളത്തോടുള്ള രാഷ്ട്രീയ പക കൊണ്ടുമാത്രമാണ്. കാസര്‍കോട്ടും ആലപ്പുഴയിലും അന്ത്യോദയ എക്‌സ്പ്രസിന് സ്റ്റോപ്പ് അനുവദിച്ചതിന്റെ പിന്നില്‍ അവിടങ്ങളില്‍ നിന്നുള്ള എം.പിമാരുടെ ശക്തമായ സമ്മര്‍ദത്താലാണെന്നും തിരൂരില്‍ സ്റ്റോപ്പ് ലഭിക്കാത്തത് പ്രതിഷേധങ്ങള്‍ പ്രസ്താവനകളില്‍ ഒതുങ്ങിപ്പോകുന്നതിനാലുമാണെന്ന പരാതി നിലനില്‍ക്കുന്നുണ്ട്. ഒരു മന്ത്രിയും സ്പീക്കറും നാല് എം.പിമാരും 14 എം.എല്‍.എമാരും ജില്ലയിലുണ്ടായിട്ടും ശക്തമായ നീക്കം നടത്താനാകുന്നില്ല.

അന്ത്യോദയ എക്‌സ്പ്രസ് തിരൂരില്‍ നിര്‍ത്തണമെന്നാവശ്യപ്പെട്ടു മന്ത്രി പിയൂഷ് ഗോയലിന് ഇന്നലെ നിവേദനം നല്‍കുമെന്ന് ഇ.ടി മുഹമ്മദ് ബഷീര്‍ എം.പി വ്യക്തമാക്കിയിട്ടുണ്ട്. ഗോയലില്‍ നിന്നുള്ള മറുപടിയ്ക്കനുസരിച്ചായിരിക്കും ഭാവി പരിപാടികളെന്നും അദ്ദേഹം പറഞ്ഞിട്ടുണ്ട്. ആവശ്യം നേടിയെടുക്കുവാന്‍ ശക്തമായ പ്രക്ഷോഭമാണു വേണ്ടതെങ്കില്‍ ജില്ലയിലെ മന്ത്രിയും സ്പീക്കറുമുള്‍പ്പടെയുള്ള മുഴുവന്‍ ജനപ്രതിനിധികളും അതിനായി മുന്നിട്ടിറങ്ങണം.