പൊന്നാനി: കടലില്‍നിന്നു ചെറിയ മത്സ്യങ്ങളെ പിടികൂടുന്ന വള്ളങ്ങള്‍ ഫിഷറീസ് വകുപ്പ് പിടികൂടി. പൊന്നാനിയില്‍നിന്നു മത്സ്യബന്ധനത്തിന് പോയ മൂന്നു ചെറിയ വള്ളങ്ങളും ഒരു ഇന്‍ബോര്‍ഡ് വള്ളവുമാണ് അനധികൃതമായി ചെറിയമത്സ്യങ്ങളെ പിടികൂടുന്നതിനിടെ ഫിഷറീസ് വകുപ്പ് നടത്തിയ പരിശോധനയില്‍ പിടിയിലായത്. അഞ്ച് ടണ്ണോളം അയിലക്കുഞ്ഞുങ്ങളെയാണ് ഈ വള്ളങ്ങളില്‍നിന്നു പിടിച്ചെടുത്തത്. ട്രോളിങ് നിരോധന സമയത്ത് കടലിലിറങ്ങുന്ന പരമ്പരാഗത മത്സ്യയാനങ്ങള്‍ക്ക് ചെറുമീനുകളെ പിടികൂടുന്നതിന് നിയന്ത്രണമുണ്ട്.
എന്നാല്‍, ചെറിയ ലാഭത്തിന് വേണ്ടി പ്രജനന ഘട്ടത്തിലുള്ള ചെറുമീനുകളെ പിടികൂടുന്നുണ്ടെന്ന വിവരത്തിന്റെ അടിസ്ഥാനത്തില്‍ കടലില്‍ നടത്തിയ പരിശോധനയിലാണ് ഇവര്‍ പിടിയിലായത്. പിടികൂടിയ മത്സ്യക്കുഞ്ഞുങ്ങളെ ഉള്‍ക്കടലില്‍ കൊണ്ടുപോയി നിക്ഷേപിച്ചു. വള്ളത്തിന്റെ ഉടമകളില്‍നിന്ന് പിഴ ഈടാക്കുകയും ചെയ്തു. ഇത്തരത്തില്‍ അനധികൃത മത്സ്യബന്ധനം നടത്തുന്നത് തുടരുന്നവര്‍ക്കെതിരേ നടപടി കര്‍ശനമാക്കുമെന്ന് ഫിഷറീസ് ഡി.ഡി.സി. ജയനാരായണന്‍ പറഞ്ഞു.
ഫിഷറീസ് അസിസ്റ്റന്റ് ഡയറക്ടര്‍ രാജു ആനന്ദ്, ഫിഷറീസ് എസ്.ഐ സുലൈമാന്‍, ബാബുരാജ്, കോസ്റ്റല്‍ പൊലിസ് ഉദ്യോഗസ്ഥര്‍, റസ്‌ക്യൂ ഗാര്‍ഡുമാര്‍ എന്നിവര്‍ ചേര്‍ന്നാണ് അനധികൃത മത്സ്യബന്ധനം നടത്തിയവരെ പിടികൂടിയത്.എന്നാല്‍ അധികൃതര്‍ അറിയാതെ ഇത്തരം മത്സ്യങ്ങളെ ഇന്നലെ പൊന്നാനിയില്‍ വ്യാപകമായി വിറ്റഴിച്ചിട്ടുണ്ട്.
കൊട്ടക്ക് പതിനായിരം രൂപമുതല്‍ പതിമൂന്നായിരം രൂപയാണ് ഈടാക്കിയത്. ഒരു കൊട്ടയില്‍ 70 മുതല്‍ 80 കിലോ വരെ മത്സ്യക്കുഞ്ഞുങ്ങളുണ്ടാകും. വളത്തിന് വേണ്ടിയാണ് ഇത്തരം ചെറുമത്സ്യങ്ങളെ വ്യാപകമായി പിടികൂടുന്നത്.വരും ദിവസങ്ങളില്‍ പരിശോധന കര്‍ശനമാക്കുമെന്ന് ഫിഷറീസ് വകുപ്പ് അറിയിച്ചു.