മുംബൈ: വര്‍ഗീയത വളര്‍ത്തുന്ന പരാമര്‍ശങ്ങള്‍ നടത്തിയെന്ന കേസില്‍ ചോദ്യം ചെയ്യലിന് ഇന്നു മുംബൈ പൊലിസിനു മുന്‍പാകെ ഹാജരാകണമെന്ന് സംഘ്പരിവാര്‍ അനുകൂല മാധ്യമപ്രവര്‍ത്തകന്‍ അര്‍ണബ് ഗോസ്വാമിക്കു കോടതി നിര്‍ദേശം. ചോദ്യം ചെയ്യലിന് ഹാജരാകുന്നതില്‍നിന്ന് ഒഴിവാക്കണമെന്ന അര്‍ണബിന്റെ ആവശ്യം തള്ളിയാണ് ബോംബെ ഹൈക്കോടതിയുടെ ഉത്തരവ്.
സമാന കേസില്‍ രണ്ടു പൊലിസ് സ്റ്റേഷനുകളിലായി രജിസ്റ്റര്‍ ചെയ്ത കേസുകള്‍ ഒന്നാക്കണമെന്ന അര്‍ണബിന്റെ ഹരജിയില്‍ വാദം കേള്‍ക്കവേയാണ് ഡിവിഷന്‍ ബെഞ്ചിന്റെ ഉത്തരവ്. ഹരജി ജൂണ്‍ 12ന് വീണ്ടും പരിഗണിക്കും. കേസ് സി.ബി.ഐക്കു വിടണമെന്ന അര്‍ണബിന്റെ ആവശ്യം നേരത്തെ സുപ്രിംകോടതി തള്ളിയിരുന്നു.