കൊച്ചി: കേരള വനിതാ കമ്മിഷന്റെ മെഗാ അദാലത്തില്‍ 47 പരാതികള്‍ തിര്‍പ്പാക്കി. എറണാകുളം കരയോഗം ഹാളില്‍ നടന്ന അദാലത്തില്‍ 115 പരാതികളാണ് പരിഗണിച്ചത്. ഇതില്‍ 47 എണ്ണത്തിനു തീര്‍പ്പ് കല്‍പ്പിച്ചു. 39 എണ്ണം അടുത്ത ഹിയറിംങിലേക്ക് മാറ്റി. തീര്‍പ്പു കല്‍പ്പിച്ചതു കൂടാതെയുള്ള പരാതികള്‍ പൊലിസ് ,ആര്‍.ഡി.ഒ, ജാഗ്രതാ സമിതി എന്നിവര്‍ക്കായി നിര്‍ദ്ദേശിച്ചു. വനിതാ കമ്മിഷന്‍ മെബംര്‍ ഡോ. ലിസി ജോസാണ് മെഗാ അദാലത്തിനു നേതൃത്വം നല്‍കിയത്.വനിതാ സെല്‍ സി.ഐ. കെ.എം ലീല, എസ്.ഐ ജോണ്‍ മേരി പോള്‍, വനിതാ കമ്മിഷന്‍ ലീഗല്‍ പാനല്‍ അംഗങ്ങളായ ജോണ്‍ എബ്രഹാം, മേഘ ദിനേശ്, കെ.ജി മേരി എന്നിവരും പരാതി പരിഹാരത്തിനായി എത്തിയിരുന്നു.
ഗാര്‍ഹിക പീഡനം, കൈയേറ്റ ശ്രമം, വസ്തു തര്‍ക്കം, സ്ത്രീധന സംബന്ധമായ പ്രശ്‌നങ്ങള്‍ എന്നിങ്ങനെയുള്ള കേസുകളാണ് അദാലത്തില്‍ പരിഗണിച്ചത്. വിദേശത്ത് ജോലി വാഗ്ദാനം ചെയ്ത് തട്ടിപ്പിനിരയായ സ്ത്രീയുടെ കേസില്‍ കമ്മിഷന്‍ പൊലിസ് സൂപ്രണ്ടിനോട് റിപ്പോര്‍ട്ട് ആവശ്യപ്പെട്ടു. 28 ലക്ഷം രൂപയാണ് ഇടനിലക്കാരന്‍ ഈ കേസില്‍ തട്ടിയെടുത്തത്.
കുടുംബപ്രശ്‌നങ്ങളെ സംബന്ധിച്ച പരാതികള്‍ അദാലത്തില്‍ കുറഞ്ഞതായി വനിതാ കമ്മിഷന്‍ മെബംര്‍ ഡോ. ലിസി ജോസു പറഞ്ഞു. എന്നാല്‍ കുടുംബപ്രശ്‌നങ്ങള്‍ കുറഞ്ഞു എന്നു പറയുവാനാകില്ലായെന്നും അവര്‍ കൂട്ടിച്ചേര്‍ത്തു. അയല്‍വാസികള്‍ തമ്മിലുള്ള തര്‍ക്കങ്ങളായിരുന്നു അദാലത്തില്‍ കൂടുതലായി ഉണ്ടായിരുന്നത്. പ്രശ്‌നങ്ങള്‍ തുറന്നു പറയാന്‍ സ്ത്രീകള്‍ കൂടുതലായി മുന്നോട്ടുവരുന്നുണ്ടെന്നും അവര്‍ പറഞ്ഞു.