ന്യൂഡല്‍ഹി: പ്രമുഖ ബോളിവുഡ് നടി ഊര്‍മിള മദോങ്കര്‍ കോണ്‍ഗ്രസില്‍ ചേര്‍ന്നു. പാര്‍ട്ടി അധ്യക്ഷന്‍ രാഹുല്‍ ഗാന്ധിയുമായി കൂടിക്കാഴ്ച നടത്തിയതിന് പിന്നാലെയാണ് ഊര്‍മിളയുടെ കോണ്‍ഗ്രസ് പ്രവേശനം.
ദിവസങ്ങള്‍ നീണ്ട അഭ്യൂഹങ്ങള്‍ അവസാനിപ്പിച്ചാണ് നടപടി. പാര്‍ട്ടിയുടെ മുംബൈ യൂനിറ്റ് അധ്യക്ഷന്‍ മിലിന്ദ് ദിയോറ, വക്താവ് രണ്‍ദീപ് സുര്‍ജേവാല എന്നിവരുടെ സാന്നിധ്യത്തിലാണ് അവര്‍ കോണ്‍ഗ്രസ് അംഗത്വമെടുത്തത്. മുംബൈ നോര്‍ത്ത് മണ്ഡലത്തില്‍ നിന്ന് ഊര്‍മിള ജനവിധി തേടുമെന്നാണ് റിപ്പോര്‍ട്ട്.
ബി.ജെ.പി സ്ഥാനാര്‍ഥിയായി ഗോപാല്‍ ഷെട്ടിയാണ് ഇവിടെ മല്‍സരിക്കുക. കോണ്‍ഗ്രസ് പ്രത്യയശാസ്ത്രത്തില്‍ പൂര്‍ണ വിശ്വാസമുള്ളതുകൊണ്ടാണ് അവര്‍ക്കൊപ്പം നില്‍ക്കാന്‍ തീരുമാനിച്ചതെന്നും ബി.ജെ.പിക്കെതിരായ രാഷ്ട്രീയ പോരാട്ടത്തിന് ഇവിടെ തുടക്കം കുറിക്കുകയാണെന്നും ഊര്‍മിള പറഞ്ഞു.