ചണ്ഡീഗഢ്: മയക്കുമരുന്ന് വില്‍ക്കുന്നതിനിടെ ബി.ജെ.പി നേതാവ് പിടിയില്‍. ഹെറോയിന്‍ വില്‍ക്കുന്നതിനിടെയാണ് മുന്‍ എം.എല്‍.എ കൂടിയായ സത്കര്‍ കൗര്‍ ഗെഹ്രി പഞ്ചാബ് പൊലിസിന്റെ നാര്‍ക്കോട്ടിക് വിരുദ്ധ സേനയുടെ പിടിയിലായത്. 

2017ല്‍ ഫിറോസാപൂര്‍ റൂറലില്‍ നിന്നുള്ള കോണ്‍ഗ്രസ് എം.എല്‍.എ ആയിരുന്നു സത്കര്‍ കൗര്‍. 2022ല്‍ സീറ്റ് നിഷേധിച്ചതോടെ ഇവര്‍ ബി.ജെ.പിയില്‍ ചേരുകയായിരുന്നു. 100 ഗ്രാം ഹെറോയിനാണ് പൊലിസ് ഇവരില്‍ നിന്ന് കണ്ടെത്തിയത്. ബന്ധുവായ ജസ്‌കീരാത് സിംഗും അറസ്റ്റിലായിട്ടുണ്ട്. തുടര്‍ന്ന് ഇവരുടെ വീട്ടില്‍ നടത്തിയ പരിശോധനയില്‍ 28 ഗ്രാം ഹെറോയിനും രേഖകളില്ലാതെ സൂക്ഷിച്ച 2 ലക്ഷം രൂപയും സ്വര്‍ണവും നിരവധി വാഹനങ്ങളുടെ രജിസ്‌ട്രേഷന്‍ നമ്പര്‍ പ്ലേറ്റുകളും പൊലിസ് കണ്ടെടുത്തു.

പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. സത്കര്‍ കൗറില്‍ നിന്ന് ലഹരി മരുന്ന് വാങ്ങിച്ചെന്നായിരുന്നു രഹസ്യ വിവരം. സ്വന്തം മൊബൈല്‍ നമ്പര്‍ അടക്കം രണ്ടിലേറെ ഫോണ്‍ നമ്പറുകളാണ് ലഹരി വില്‍പനയ്ക്കായി സത്കര്‍ കൗര്‍ ഉപയോഗിച്ചിരുന്നത്. പൊലീസിനെ കണ്ടതോടെ രക്ഷപ്പെടാന്‍ സത്കര്‍ കൗര്‍ ശ്രമിച്ചു.  വ്യാജ നമ്പര്‍ പ്ലേറ്റുകളുള്ള ആഡംബര കാറുകളിലായിരുന്നു മയക്കുമരുന്ന് വില്‍പനയെന്ന് പൊലിസ് പറഞ്ഞു.