ന്യൂഡല്‍ഹി: ഹേമ കമ്മിറ്റി റിപ്പോര്‍ട്ടില്‍ സി.ബി.ഐ അന്വേഷണം ആവശ്യപ്പെട്ട് സുപ്രിം കോടതിയില്‍ ഹരജി. സുപ്രിം കോടതി അഭിഭാഷകന്‍ അജീഷ് കളത്തിലാണ്  റിട്ട് ഹരജി സമര്‍പ്പിച്ചത്. സര്‍ക്കാര്‍ അഞ്ച് വര്‍ഷം റിപ്പോര്‍ട്ട് പൂഴ്ത്തിയതില്‍ ഗൂഢാലോചനയുണ്ടെന്നും ഇക്കാര്യം അന്വേഷിക്കണമെന്നുമാണ് ഹരജിയിലെ ആവശ്യം. 

ജസ്റ്റിസ്മാരായ ഹൃഷികേശ് റോയ്, എസ്.വി. ഭട്ടി എന്നിവര്‍ അടങ്ങിയ ബെഞ്ചിന് മുമ്പാകെയാണ് ഹരജി ലിസ്റ്റ് ചെയ്തിരിക്കുന്നത്. ഹരജി വെള്ളിയാഴ്ച പരിഗണിക്കും. 

സംസ്ഥാന സര്‍ക്കാര്‍, സി.ബി.ഐ, ദേശീയ വനിതാ കമീഷന്‍ അടക്കം എതിര്‍ കക്ഷികളാക്കിയാണ് ഹരജി. റിപ്പോര്‍ട്ടില്‍ പുറത്തുവന്ന വസ്തുതകളുടെ അടിസ്ഥാനത്തില്‍ പൊലിസിന് കേസെടുക്കാന്‍ നിര്‍ദേശം നല്‍കണമെന്നും സിനിമ പ്രശ്‌നങ്ങള്‍ പഠിക്കാന്‍ ദേശീയ വനിതാ കമീഷനോട് നിര്‍ദേശിക്കണമെന്നും ഹരജിയില്‍ പറയുന്നു.

അതേസമയം, ജസ്റ്റിസ് ഹേമ കമ്മിറ്റി മുമ്പാകെ മൊഴി നല്‍കിയ നടിമാരുടെ പരാതികളില്‍ കേസെടുക്കാന്‍ പ്രത്യേക അന്വേഷണസംഘത്തിന് അനുമതി നല്‍കിയ കേരള ഹൈക്കോടതി വിധി അടിയന്തരമായി സ്റ്റേ ചെയ്യാന്‍ സുപ്രിം കോടതി വിസമ്മതിച്ചിരുന്നു.

ഹൈക്കോടതി വിധിക്കെതിരെ സിനിമ നിര്‍മാതാവ് സജിമോന്‍ പാറയില്‍ സമര്‍പ്പിച്ച ഹരജിയില്‍ എതിര്‍കക്ഷികള്‍ക്ക് നോട്ടിസ് അയച്ച സുപ്രിം കോടതി സ്റ്റേ ആവശ്യത്തിലും വാദം കേള്‍ക്കുമെന്ന് വ്യക്തമാക്കി. ജസ്റ്റിസുമാരായ വിക്രം നാഥ്, പി.ബി. വരാലെ എന്നിവര്‍ അടങ്ങുന്ന ബെഞ്ച് ഹരജി മൂന്നാഴ്ചക്കുശേഷം പരിഗണിക്കും.