ഫറോക്ക്: കോട്ടപ്പാടം വാലഞ്ചേരിത്താഴത്ത് ഗൃഹനാഥനെ വടിവാള്‍ വീശി അക്രമിക്കാന്‍ ശ്രമിച്ച കേസില്‍ ഒരാള്‍കൂടി അറസ്റ്റില്‍. കടലുണ്ടി മണ്ണൂര്‍ വടക്കുമ്പാട് കൊട്ടലകത്ത് അജ്്മല്‍ (22) ആണ് ഇന്നലെ പൊലിസ് പിടിയിലായത്.
കഴിഞ്ഞ 30നായിരുന്ന സംഭവം. രാത്രി 10:30ന് കോട്ടപ്പാടം വാലഞ്ചേരിത്താഴം ഷറഫുദ്ദീനു നേരെയാണ് അക്രമണ ശ്രമം നടന്നത്. കേസിലുള്‍പ്പെട്ട മണ്ണൂര്‍ റെയില്‍ കോട്ടാത്തില്‍ തറയില്‍ മുഹമ്മദ് ഷരീഫ് (19), മണ്ണൂര്‍ വാലത്ത് പറമ്പ് റിയാസ് (24) എന്നിവരെ നേരത്തെ അറസ്റ്റ് ചെയ്തിരുന്നു. അന്ന് ഓടി രക്ഷപ്പെട്ട അജ്്മലിനെ അഡീഷണല്‍ എസ്.ഐ എം.സി ഹരീഷാണ് അറസ്റ്റ് ചെയതത്.വാലഞ്ചേരിത്താഴത്ത് എത്തിയ സംഘാംഗങ്ങള്‍ തമ്മില്‍ തര്‍ക്കത്തിലേര്‍പ്പെടുകയും ബഹളം കേട്ടെത്തിയ ഷറഫുദ്ദിനെ നേരെ വടിവാള്‍ വീശി ആക്രമിക്കാന്‍ ശ്രമിക്കുകയുമായിരുന്നു. ബൈക്കില്‍ രക്ഷപ്പെടാന്‍ ശ്രമിച്ച ഷരീഫിനെയും റിയാസിനെയും നാട്ടുകരാണ് പിന്തുടര്‍ന്നു പിടികൂടിയത്. സംഘം ഉപേക്ഷിച്ച വാള്‍ പിന്നീട് ഇ.എസ്.ഐ ആശുപത്രിക്കു സമീപത്തെ വീട്ടുമുറ്റത്തു നിന്നും കണ്ടെടുത്തു. അറസ്റ്റിലായ അജ്മലിനെ കോടതി റിമാന്റ് ചെയ്തു.