ലഖ്‌നൗ: പൊലിസില്‍ പരാതി പറയാനെത്തിയ മധ്യവയസ്‌ക സ്റ്റേഷനു മുന്‍പില്‍ വെടിയേറ്റു മരിച്ചു. ഉത്തര്‍പ്രദേശിലെ മൈന്‍പൂരി ജില്ലയിലാണ് സംഭവം.
ഭൂമിതര്‍ക്കവുമായി ബന്ധപ്പെട്ട് വസീം എന്ന യുവാവില്‍നിന്ന് ജീവനു ഭീഷണിയുണ്ടെന്ന് ആഗ്രാ ഗേറ്റ് പൊലിസില്‍ പരാതി പറയാനെത്തിയ അനീസാ ബീഗം(45) ആണ് സ്റ്റേഷനു മുന്‍പില്‍ കൊല്ലപ്പെട്ടത്. മാതാവിനും സഹോദരിക്കുമൊപ്പം സ്റ്റേഷനിലെത്തിയ വസീം അനീസയെ അടിച്ചുവീഴ്ത്തിയ ശേഷം റിവോള്‍വറില്‍നിന്ന് നാലുതവണ നിറയൊഴിക്കുകയായിരുന്നു. ഇവരെ ഉടന്‍ ആശുപത്രിയിലെത്തിച്ചെങ്കിലും രക്ഷിക്കാനായില്ല.
സംഭവത്തില്‍ മൂന്നുപേരെ അറസ്റ്റ് ചെയ്തതായി എസ്.പി സുനില്‍ കുമാര്‍ സക്‌സേന പറഞ്ഞു. വിശദമായ അന്വേഷണം പ്രഖ്യാപിച്ചിട്ടുണ്ട്.