എടപ്പാള്‍: കൊലപാതക രാഷ്ട്രീയത്തിനെതിരേ കലാലയങ്ങളില്‍ ജാഗ്രതാ സമിതികള്‍ രൂപപ്പെടുത്തി വരുംതലമുറയുടെ സുരക്ഷ ഉറപ്പുവരുത്താന്‍ സര്‍ക്കാര്‍ അടിയന്തിര നടപടികള്‍ കൈകൊള്ളണമെന്ന് വിദ്യാര്‍ഥികള്‍. 'കലാലയ രാഷട്രീയം കലാപകലുഷമാകുമ്പോള്‍' എന്ന വിഷയത്തില്‍ കടകശ്ശേരി ഐഡിയല്‍ കോളജ് കൊമേഴ്‌സ് ആന്‍ഡ് മാനേജ്‌മെന്റ് വിഭാഗത്തിന്റെ ആഭിമുഖ്യത്തില്‍ സംഘടിപ്പിച്ച ചര്‍ച്ചാ സംഗമത്തിലാണ് വിദ്യാര്‍ഥികള്‍ ഐകകണ്‌ഠേന അഭിപ്രായപ്പെട്ടത്.
സൗഹൃദങ്ങളും സര്‍ഗാത്മകതയും വിളയേണ്ട കാംപസിനകത്ത് പുറമെനിന്നുള്ളവരുടെ ഇടപെടല്‍ ആശങ്കാജനകമാണ്. രാഷ്ട്രീയ പ്രവര്‍ത്തനം രാക്ഷസീയമാകുന്ന സാഹചര്യങ്ങളെ നിയമം മൂലം നിയന്ത്രിക്കണം. ഐഡിയല്‍ കോളജ് എന്‍.എസ്.എസ് പ്രോഗ്രാം ഓഫിസര്‍ യാക്കൂബ് പൈലിപ്പുറം ചര്‍ച്ച നയിച്ചു. അസി. പ്രൊഫസര്‍ മുഹമ്മദ് റാഫി, രജിത. ആര്‍, പൊന്നി.കെ, വിദ്യാര്‍ഥി പ്രതിനിധികളായ ശൈഖ അബ്ദുല്‍ ജലീല്‍, എം. ഷവാഫ്, വി. സനൂപ്, അബ്ദുല്‍ മുഹൈമിന്‍, പി. രഹന സംസാരിച്ചു.