മുതലമട : സോഷ്യല്‍ മീഡിയയില്‍ ദീപ നിഷാന്തുണ്ടാക്കിയ വിവാദവും ആലത്തൂര്‍ മണ്ഡലം യു.ഡി.എഫ് സ്ഥാനാര്‍ഥി രമ്യ ഹരിദാസിന്റെ തെരഞ്ഞെടുപ്പ് പ്രചാരണം ആവേശഭരിതമാക്കുന്ന കാഴ്ചയാണ് മണ്ഡലത്തിലെങ്ങും. കേരളത്തിലെ വാദ്യഗോപുരങ്ങളായ പല്ലാവൂര്‍ ത്രയങ്ങള്‍ക്ക് ജന്മം നല്‍കിയ പല്ലശ്ശനയില്‍ നിന്നാണ് ബുധനാഴ്ച രാവിലെ ആലത്തൂര്‍ മണ്ഡലം യു.ഡി. എഫ് സ്ഥാനാര്‍ഥിയുടെ പ്രചാരണം തുടങ്ങിയത്. പഴയ കാവ് ഭഗവതി ക്ഷേത്രത്തില്‍ തൊഴുതതിനു ശേഷം ക്ഷേത്രം ഭാരവാഹികളെ കണ്ടു. പാതയോരത്തെയും സമീപത്തെ കടകളിലെയും വോട്ടര്‍മാരെ കണ്ട് വോട്ടഭ്യര്‍ഥിച്ചു.
പല്ലശ്ശനയില്‍ നിന്നും നേരെ കേരളത്തിന്റെ മാംഗോസിറ്റി മുതലമടയിലേക്ക്. കോണ്‍ഗ്രസ് മണ്ഡലം കമ്മിറ്റി ഓഫീസ് പി.കെ.ജയരാജ് സ്മാരക മന്ദിരത്തിലെത്തി നേതാക്കളുമായി ആശയവിനിമയം തുടര്‍ന്ന് രണ്ട് മരണവീടുകളിലെത്തി അനുശോചനം. പഞ്ചായത്ത് കണ്‍വന്‍ഷന്‍ നടക്കുന്ന പോത്തമ്പാടത്തെ കമ്മ്യൂണിറ്റി ഹാളിലെത്തിയ സ്ഥാനാര്‍ഥിയെ മുദ്രാവാക്യം വിളികളോടെ സ്വീകരിച്ചു. കഥയും കാര്യവുമായി വോട്ടഭ്യര്‍ഥന ,തുടര്‍ന്ന് കൊല്ലങ്കോട്ടേക്ക്. കുരുവിക്കൂട്ടുമരത്ത് കൂടി നിന്ന നൂറു കണക്കിന് യു.ഡി.എഫ് പ്രവര്‍ത്തകര്‍ക്കൊപ്പം റോഡ് ഷോ, ഇതിനിടെ വിവിധ ചാനലുകള്‍ക്കു വേണ്ടിയുള്ള ഉത്തരങ്ങള്‍. വടവന്നൂരിലേക്കുള്ള യാത്രാ മധ്യ ഊട്ടറയില്‍ കൂടി നിന്ന പ്രവര്‍ത്തകര്‍ സ്ഥാനാര്‍ഥിയേയും ആനയിച്ച് കടകളിലും വീടുകളിലുമെത്തിച്ചുള്ള വോട്ടഭ്യര്‍ഥന.
വടവന്നൂരിലെ യു.ഡി.എഫ്.പ്രവര്‍ത്തക കണ്‍വന്‍ഷന്‍ തീര്‍ത്ത് പുതുനഗരത്തേക്ക്. കരിപ്പോട്ടിലെ റോഡ് ഷോ കഴിഞ്ഞ് ഉച്ചഭക്ഷണത്തിനു ശേഷം കൊടുവായൂരിലെ പ്രവര്‍ത്തക കണ്‍വന്‍ഷനിലേക്ക്. എലവഞ്ചേരിയില്‍ സ്ഥാനാര്‍ഥിയെ എതിരേല്‍ക്കാന്‍ വാദ്യമേളങ്ങളോടെ ആവേശഭരിതരായി പ്രവര്‍ത്തകര്‍. തുടര്‍ന്ന് അയിലൂരിലെ സ്വീകരണ സ്ഥലത്തേക്ക് .
പഞ്ചായത്ത് അതിര്‍ത്തിയായ കയ്പ്പഞ്ചേരിയില്‍ ബൈക്ക് റാലിയുമായി യൂത്ത് കോണ്‍ഗ്രസുകാര്‍. പടിഞ്ഞാറെത്തറ കോളനിയിലെ സ്വീകരണം രമ്യ ഹരിദാസിന്റെ വിജയ പ്രഖ്യാപന സമ്മേളനമായി. തുടര്‍ന്ന് നിയമസഭ നിയോജക മണ്ഡലം ആ സ്ഥാനാമായ നെന്മാറയിലേക്ക്.
പ്രവര്‍ത്തകരുടെ ആവേശത്തേരിലേറി വേലയുടെ നാട്ടിലേക്ക് . നെന്മാറ വല്ലങ്ങിദേശങ്ങളിലൂടെ വേലയാവേശത്തില്‍ പ്രവര്‍ത്തകര്‍ അണിനിരന്നപ്പോള്‍ അമിട്ടു പൊട്ടുന്ന വാക്കുകള്‍ കൊണ്ട് കൂട്ടു പടക്കത്തിന്റെ കൈയ്യടി നേടി സ്ഥാനാര്‍ഥി. നെന്മാറ നിയോജക മണ്ഡലത്തിലെ സ്ഥാനാര്‍ഥിയുടെ പ്രവര്‍ത്തകരുമായുള്ള കൂടിക്കാഴ്ച വന്‍ കണ്‍വന്‍ഷനുകളും വന്‍ റാലികളുമായി മാറിയത് വിജയഭേരി മുഴക്കാന്‍ തയ്യാറെടുക്കുന്ന പ്രവര്‍ത്തകര്‍ക്ക് നിറഞ്ഞ ആവേശമായി.