വടകര: കാലിക്കറ്റ് യൂനിവേഴ്‌സിറ്റി യൂനിയന്‍ ബി സോണ്‍ കലോത്സവത്തിന് ഇന്നു വടകരയില്‍ തുടക്കമാവും. അഞ്ചു ദിവസങ്ങളിലായി നടക്കുന്ന ഓഫ് സ്റ്റേജ് മത്സരങ്ങള്‍ രാവിലെ 9 മണി മുതല്‍ വില്യാപ്പള്ളി എം.ഇ.എസ് കോളജില്‍ നടക്കും.
22, 23, 24 തിയതികളിലായി സ്‌റ്റേജിതര മത്സരങ്ങള്‍ വടകര എം.യു.എം ഹൈസ്‌കൂളില്‍ വച്ചാണ് നടക്കുക. സൈക്ലോണ്‍ ഷെല്‍ട്ടര്‍, മുക്കോലഭാഗം ഗ്രൗണ്ട്, എം.യു.എം.യു.പി സ്‌കൂള്‍, മുക്കോലഭാഗം ജെ.ബി സ്‌കൂള്‍ എന്നിവയാണ് സ്റ്റേജിതര മത്സരങ്ങളുടെ മറ്റു വേദികള്‍.യൂനിവേഴ്‌സിറ്റിയുടെ കീഴിലുള്ള 68 കോളജുകളില്‍ നിന്നായി 103 ഇനങ്ങളില്‍ 2144 മത്സരാര്‍ഥികളാണ് മാറ്റുരയ്ക്കുന്നതെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
ഓഫ് സ്റ്റേജ് മത്സരങ്ങളുടെ ഉദ്ഘാടനം ഇന്നു 10ന് പ്രശസ്ത ചിത്രകാരന്‍ കെ.എം ഫിറോസ് നിര്‍വഹിക്കും സ്റ്റേജിന മത്സരങ്ങളുടെ ഉദ്ഘാടനം എം.യു.എം ഹൈസ്‌കൂളില്‍ 23ന് വൈകീട്ട് ആറിനു ഡോ. എം.കെ മുനീര്‍ എം.എല്‍.എ നിര്‍വഹിക്കും. ചലച്ചിത്ര താരം പത്മപ്രിയ ചടങ്ങില്‍ മുഖ്യാതിഥിയായിരിക്കും. 24ന് നടക്കുന്ന സമാപന സമ്മേളനം മുല്ലപ്പള്ളി രാമചന്ദ്രന്‍ എം.പി ഉദ്ഘാടനം ചെയ്യും. വാര്‍ത്താസമ്മേളനത്തില്‍ ലത്തീഫ് തുറയൂര്‍, അഫ്‌നാസ് ചോറോട്, ഷിനൂബ്, പി.കെ അംജിത്, പി. ഹംറാസ് പങ്കെടുത്തു.