കൊണ്ടോട്ടി: കരിപ്പൂര്‍ വിമാനത്താവളത്തിലെ അസി. ടെര്‍മിനല്‍ മാനേജര്‍ക്ക് കൊവിഡ് സ്ഥിരീകരിച്ചു. 

ഇതോടെ എയര്‍പോര്‍ട്ട് ഡയരക്ടര്‍ അടക്കമുള്ള ജീവനക്കാര്‍ ക്വാറന്റൈനില്‍ പ്രവേശിച്ചു. കോഴിക്കോട് കുതിരവട്ടം മൈലമ്പാടി സ്വദേശിയായ 26കാരനാണ് ഇന്നലെ രോഗം സ്ഥിരീകരിച്ചത്. ഇയാളെ മഞ്ചേരി മെഡിക്കല്‍ കോളജിലേക്ക് മാറ്റി.

കഴിഞ്ഞ ഏഴിനാണ് ഇയാളുടെ സ്രവം പരിശോധനയ്ക്ക് അയച്ചത്. ഇന്നലെ പോസിറ്റീവ് ആണെന്ന് കണ്ടെത്തി. ഇയാള്‍ ഇന്നലെയും വിമാനത്താവളത്തില്‍ ജോലിയിലുണ്ടായിരുന്നു. തുടര്‍ന്ന് കൊവിഡ് സ്ഥിരീകരിച്ചയാളുമായി സമ്പര്‍ക്കത്തില്‍ ഏര്‍പ്പെട്ടവരെ കണ്ടെത്താന്‍ വിവിധ വിഭാഗങ്ങളിലെ സി.സി.ടി വികള്‍ പരിശോധിച്ചു. 

വിമാനത്താവള ഡയരക്ടര്‍ അടക്കം 20ലേറെ ജീവനക്കാരാണ് ക്വാറന്റൈയിനിലേക്ക് മാറിയത്. കസ്റ്റംസ്, സി.ഐ.എസ്.എഫ്, എയര്‍പോര്‍ട്ട് അതോറിറ്റിയടക്കമുള്ള വിഭാഗത്തിലെ ജീവനക്കാരാണിവര്‍. കഴിഞ്ഞ ഞായറാഴ്ച കരിപ്പൂരിലെ നിരവധി ഉദ്യോഗസ്ഥര്‍ മഞ്ചേരിയിലെത്തി കൊവിഡ് പരിശോധനയ്ക്കായി സ്രവം നല്‍കിയിരുന്നു. ഈ പരിശോധനാ റിപ്പോര്‍ട്ടാണ് ഇന്നലെ ലഭിച്ചത്.