തളിപ്പറമ്പ്: കാലപ്പഴക്കം ചെന്ന് പുനര്‍നിര്‍മിച്ച പുഷ്പഗിരി ബദര്‍ ജുമാമസ്ജിദിന്റെ ഉദ്ഘാടനവും പൊതു സമ്മേളനവും ഇന്ന് നടക്കും. ആലക്കോട് റോഡില്‍ പുഷ്പഗിരിയില്‍ പതിറ്റാണ്ടുകള്‍ക്ക് മുമ്പും മര്‍ഹും കൊമ്മച്ചി മൊയ്തീന്‍കുട്ടി ഹാജി സ്ഥലം ദാനമായി നല്‍കിയ സ്ഥലത്ത് മഹല്ല് കമ്മിറ്റിയുടെയും ഖത്തീബ് അബ്ദുല്‍ ശുക്കൂര്‍ ഫൈസിയുടെയും നേതൃത്വത്തിലാണ് ബദര്‍ ജുമാമസ്ജിദിന്റെ പുനര്‍നിര്‍മാണം പൂര്‍ത്തീകരിച്ചത്.
ഇവിടെ തന്നെയുളള അന്‍സാറുല്‍ ഇസ്‌ലാം ഹയര്‍ സെക്കന്‍ഡറി മദ്‌റസയുടെ പുനര്‍നിര്‍മാണം ആദ്യം തന്നെ പൂര്‍ത്തീകരിച്ചിരുന്നു. മഗ്‌രിബ് നിസ്‌ക്കാരാന്തരം നടക്കുന്ന ചടങ്ങില്‍ സമസ്ത വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുള്‍ സലാം മുസ്‌ലിയാര്‍ പ്രാര്‍ഥന നിര്‍വഹിക്കും. ഖത്തീബ് കെ.സി അബ്ദുല്‍ ഷുക്കൂര്‍ ഫൈസി അധ്യക്ഷനാകും. പാണക്കാട് ഹമീദലി ശിഹാബ് തങ്ങള്‍ ഉദ്ഘാടനം നിര്‍വഹിക്കും. ഷൈക്ക് യൂസഫ് അബ്ദുല്ല ഹുസൈന്‍ അല്‍ ഖൂരി മുഖ്യാതിഥിയാകും. പ്രൊഫ. ആലിക്കുട്ടി മുസ്‌ലിയാര്‍ അനുഗ്രഹ പ്രഭാഷണം നടത്തും. അഷറഫ് റഹ്മാനി ചൗക്കി മുഖ്യ പ്രഭാഷണം നടത്തും. ചടങ്ങില്‍ പ്രമുഖര്‍ സംബന്ധിക്കും.
കെ.സി അബ്ദുള്‍ ശുക്കൂര്‍ ഫൈസി, സി. അബ്ദുള്‍കരീം ഹാജി, കെ.പി സ്വാലിഹാജി, മുഹമ്മദ് കുഞ്ഞി ഹാജി പന്നിയൂര്‍, സി.പി മുഹമ്മദ് ഹാഷിം വാര്‍ത്താസമ്മേളനത്തില്‍ പങ്കെടുത്തു.