കൊച്ചി: യു.ഡി.എഫ് എറണാകുളം ലോക്‌സഭാ മണ്ഡലം സ്ഥാനാര്‍ഥി ഹൈബി ഈഡനെതിരേ ബലാല്‍സംഗ കുറ്റമാരോപിച്ച് ഹൈക്കോടതിയെ സമീപിച്ച കേസിന്റെ അന്വേഷണം ഊര്‍ജിതമാക്കണമെന്ന ഇരയുടെ ഹരജി പരിഗണിച്ച ഹൈക്കോടതി അമിക്കസ് ക്യൂറിയെ നിയമിച്ചു.

ഹൈബിക്കെതിരേ ഉയര്‍ന്ന പരാതിയില്‍ അന്വേഷണം ത്വരിതപ്പെടുത്തണമെന്നാവശ്യപെട്ട ഹരജിയിലെ ആരോപണങ്ങളും കേസിലെ സാഹചര്യങ്ങളും കണക്കിലെടുക്കുമ്പോള്‍ അമിക്കസ് ക്യൂറിയുടെ സേവനം ആവശ്യമുണ്ടെന്ന് കണ്ടെത്തിയാണ് കോടതിയുടെ ഉത്തരവ്.

2011 സെപ്റ്റംബറിലാണ് കേസിനാസ്പദമായ സംഭവം. ടീം സോളാര്‍ കമ്പനിയുടെ ചുമതലയിലിരിക്കേ പച്ചാളം സൗന്ദര്യവത്കരണ പദ്ധതിയുടെ ഭാഗമായി ഹൈബി ഈഡന്‍ ഹോസ്റ്റലില്‍ വിളിച്ചുവരുത്തി പീഡിപ്പിച്ചെന്നായിരുന്നു യുവതിയുടെ പരാതി.

കേസിന്റെ വസ്തുതകളും സാഹചര്യവും പരിഗണിച്ചാണ് അഡ്വ.മിദ സുധീന്ദ്രനെ അമിക്കസ് ക്യൂറിയായി ജസ്റ്റീസ് അലക്‌സാണ്ടര്‍ തോമസ് നിയമിച്ചത്. മെയ് 25 ന് മുമ്പായി അമിക്കസ് ക്യൂറി റിപ്പോര്‍ട്ട് നല്‍കണം.