നീലേശ്വരം: മാര്‍ക്കറ്റ് ജങ്ഷനിലെ ടൂറിസ്റ്റ് ടാക്‌സി സ്റ്റാന്റിലെ വാഹനങ്ങളില്‍ രാത്രി കാലങ്ങളില്‍ മോഷണം പതിവായി. ഇവയിലെ വിലപിടിപ്പുള്ള ഇലക്ട്രോണിക്‌സ് ഉപകരണങ്ങളാണ് മോഷണം പോകുന്നത്. കഴിഞ്ഞ ദിവസം യുവി, ഹക്കിം ചായ്യോത്ത്, രാജന്‍ എന്നിവരുടെ മിനി ബസുകളില്‍ നിന്ന് 8000 രൂപ വിലയുള്ള സ്റ്റീരിയോ, പെന്‍ഡ്രൈവ്, സ്പീക്കര്‍ സെറ്റ് എന്നിവ മോഷണം പോയി.
        ലോക്ക് ചെയ്ത വാഹനങ്ങളിലെ വശങ്ങളിലെ ഗ്ലാസുകള്‍ തന്ത്രപരമായി നീക്കിയാണ് മോഷണം. കാഞ്ഞങ്ങാട്ടെ ടാക്‌സി ഡ്രൈവര്‍ വിപിന്‍ ഓട്ടം കഴിഞ്ഞതിനു ശേഷം ഇവിടെ വാഹനം പാര്‍ക്ക് ചെയ്തിരുന്നു. അതില്‍ നിന്നു പെന്‍ഡ്രൈവുകളും മോഷണം പോയിട്ടുണ്ട്. ഇതു സംബന്ധിച്ച് പൊലിസില്‍ പരാതി നല്‍കി.
ഇതോടെ പൊലിസിന്റെ രാത്രികാല പട്രോളിങ് കര്‍ശനമാക്കണമെന്ന ആവശ്യവും ശക്തമായിരിക്കുകയാണ്.