പരപ്പനങ്ങാടി: ചെട്ടിപ്പടി- ആലുങ്ങല്‍ ബീച്ച് റോഡ് പൂര്‍ണമായും തകര്‍ന്നു. ഇതുവഴി സര്‍വിസ് നടത്തിയാല്‍ ഓട്ടോകള്‍ക്ക് തകരാര്‍ സംഭവിക്കുകയാണെന്നാരോപിച്ച് ഓട്ടോ തൊഴിലാളി കൂട്ടായ്മ പ്രക്ഷോഭത്തിനൊരുങ്ങുന്നു.
കഴിഞ്ഞ ദിവസങ്ങളില്‍ പെയ്ത കനത്ത മഴയിലാണ് റോഡ് തകര്‍ന്നത്. മത്സ്യബന്ധന മേഖലയായ ആലുങ്ങല്‍ തീരദേശത്തേക്കുള്ള പ്രധാന റോഡാണ് ഇത്. മറ്റു യാത്രാ സൗകര്യങ്ങളില്ലാത്തതിനാല്‍ ഓട്ടോറിക്ഷകളാണ് ഇവിടേക്ക് സര്‍വിസ് നടത്തുന്നത്. ഇതുവഴിയുള്ള ഓട്ടം കാരണം ഓട്ടോറിക്ഷകള്‍ക്ക് മെയിന്റനന്‍സ് വര്‍ക്കുകള്‍ക്ക് അധികംതുക ചെലവാകുകയാണെന്നും റോഡ് ഉടന്‍ പുനര്‍നിര്‍മിക്കണമെന്നും ചെട്ടിപ്പടി ഓട്ടോ ഡ്രൈവേഴ്‌സ് കോഡിനേഷന്‍ കമ്മിറ്റി യോഗം ആവശ്യപ്പെട്ടു. റോഡ് തകര്‍ച്ച ഓട്ടോ ഓടിച്ച് ഉപജീവനം നടത്തുന്ന ഡ്രൈവര്‍മാരുടെ അന്നംമുട്ടിക്കുകയാണെന്നും യോഗം കുറ്റപ്പെടുത്തി. അഷ്‌റഫ് കൊടക്കാട് അധ്യക്ഷനായി. സലാം തങ്ങള്‍, ജലീല്‍ ബോസ്, ബിജു മണലി, സുരേശന്‍, കെ.വി ഇബ്രാഹിം, സുരേഷ് ബാബു സംസാരിച്ചു.