കല്‍പ്പറ്റ: ജില്ലയിലെ 15 വയസിനും 50 വയസിനും ഇടയില്‍ പ്രായമുള്ള മുഴുവന്‍ ആദിവാസി വിഭാഗങ്ങളെയും വിദ്യാഭ്യാസപരമായി ഉയര്‍ത്തിക്കൊണ്ടുവരുന്നതിന് ജില്ലയില്‍ ആദിവാസി സാക്ഷരത പരിപാടി ആരംഭിക്കാന്‍ സംസ്ഥാന സര്‍ക്കാര്‍ തീരുമാനിച്ചതായി സി.കെ ശശീന്ദ്രന്‍ എം.എല്‍.എ പറഞ്ഞു.
അതിനുള്ള തുക ഈ വര്‍ഷത്തെ ബഡ്ജറ്റില്‍ ഉള്‍ക്കൊള്ളിച്ചിട്ടുണ്ടെന്നും അദ്ദേഹം പറഞ്ഞു. ജില്ലാസാക്ഷരത മിഷന്റെ ആഭിമുഖ്യത്തില്‍ സമ്പൂര്‍ണ്ണ സാക്ഷരത പ്രഖ്യാപന ദിനാചരണത്തിന്റെ 26-ാം വാര്‍ഷികം കല്‍പ്പറ്റയില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കലാസംഗമത്തില്‍ ഒന്നാം സ്ഥാനം നേടിയ കല്‍പ്പറ്റ നഗരസഭ, ബ്ലോക്കിനും കായികോത്സവത്തില്‍ ഒന്നാം സ്ഥാനം നേടിയ സുല്‍ത്താന്‍ ബത്തേരി നഗരസഭ. ബ്ലോക്കിനും ട്രോഫികള്‍ എം.എല്‍.എ വിതരണം ചെയ്തു.
ജില്ലാ പഞ്ചായത്ത് പ്രസിഡന്റ ടി ഉഷാകുമാരി അധ്യക്ഷയായി. 2017-ലെ അടിസ്ഥാന സാക്ഷരതാ പരിപാടിയുടെ ജില്ലാ തല ഉദ്ഘാടനം ജില്ലാ പഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എ ദേവകി നിര്‍വഹിച്ചു.
ജില്ലാ പഞ്ചായത്തംഗം അഡ്വ. ഒ.ആര്‍ രഘു, ഹയര്‍ സെക്കന്‍ഡറി തുല്യത കോഴ്‌സ് കണ്‍വീനര്‍ ചന്ദ്രന്‍ കെനാത്തി, പ്രേരക്മാരുടെ പ്രതിനിധികളായ എ മുരളീധരന്‍, കെ മിനിമോള്‍, സ്റ്റാഫ് പ്രതിനിധികളായ എ.എസ് ഗീത, പി.വി ജാഫര്‍ എന്നിവര്‍ സംസാരിച്ചു. ജില്ലാ കോഡിനേറ്റര്‍ പി.പി സിറാജ് സ്വാഗതവും അസി.
കോഡിനേറ്റര്‍ പി.എന്‍ ബാബു നന്ദിയും പറഞ്ഞു.