ബെയ്ജിങ്: ദക്ഷിണ ചൈനാ കടലിലെ തങ്ങളുടെ പരമാധികാരം കാത്തുസൂക്ഷിക്കാന്‍ വ്യോമപ്രതിരോധ മേഖലയാക്കുമെന്ന് ചൈന. കഴിഞ്ഞ ദിവസം അന്താരാഷ്ട്ര നീതിന്യായ കോടതിയുടെ വിധി അംഗീകരിക്കില്ലെന്നു വ്യക്തമാക്കിയ ചൈനയുടെ പുതിയ പ്രസ്താവന മേഖലയില്‍ സംഘര്‍ഷമുണ്ടാകുമെന്ന സൂചനയാണ് നല്‍കുന്നത്. ചൈനീസ് ഉപ വിദേശകാര്യമന്ത്രി ലിയു സെന്‍മിന്‍ ആണ് ഇതു സംബന്ധിച്ച പ്രസ്താവന നടത്തിയത്.
ദക്ഷിണ ചൈനാകടലില്‍ ചൈനയ്ക്ക് നിയമപരമായ അധികാരമില്ലെന്നുള്ള യു.എന്‍ കോടതിയുടെ വിധിക്കെതിരേയാണ് ചൈനയുടെ പ്രതികരണം. കേസില്‍ ഫിലിപ്പൈന്‍സിന് അനുകൂലമായായിരുന്നു വിധി.
തന്ത്രപ്രധാന മേഖലയായ ദക്ഷിണ ചൈനാ കടല്‍ കൈയേറി സ്വന്തം പ്രദേശമാക്കി മാറ്റാനുള്ള ചൈനയുടെ ശ്രമങ്ങള്‍ക്ക് തിരിച്ചടിയേറ്റത് ചൈനയെ പ്രകോപിപ്പിച്ചു. തങ്ങള്‍ക്കെതിരേ എത്രത്തോളം ഭീഷണിയുണ്ടാകുന്നുവോ അത് അനുസരിച്ചായിരിക്കും തുടര്‍നീക്കമെന്ന് ചൈന പറഞ്ഞു. ദക്ഷിണ ചൈന കടലിനെ സമാധാനവും സഹകരണവും സൗഹൃദവും നിറഞ്ഞ ഇടമാക്കാനാണ് ചൈന ആഗ്രഹിക്കുന്നത്.
വ്യോമപ്രതിരോധ മേഖലയെന്നാല്‍ ചൈനീസ് സൈന്യത്തിന് സര്‍വാധികാരമുള്ള മേഖലയായി ദക്ഷിണ ചൈന കടല്‍ മാറുമെന്നാണ് അര്‍ഥം.
വിദേശ വിമാനങ്ങളെ മേഖലയില്‍ പ്രവേശിപ്പിക്കാതിരിക്കാനും ഇവയുടെ നിരീക്ഷണം അവസാനിപ്പിക്കാനും ഇതോടെ ചൈനയ്ക്കാവും. 2013ല്‍ കിഴക്കന്‍ ചൈന കടലില്‍ വ്യോമപ്രതിരോധ മേഖല തീര്‍ക്കാനുള്ള ശ്രമം അയല്‍രാജ്യമായ ജപ്പാന്‍ എതിര്‍ത്തിരുന്നു. ജപ്പാന് പിന്തുണയുമായി അമേരിക്കയും സഖ്യ ശക്തികളുമെത്തുകയും ചെയ്തു.