കോഴിക്കോട്: കൊവിഡിനെ മറയാക്കി ചെലവ് ചുരുക്കലിന്റെ പേരില്‍ വിദ്യാഭ്യാസ മേഖലയിലടക്കം നിയമന നിരോധനം ഏര്‍പ്പെടുത്താനുള്ള സര്‍ക്കാര്‍ നീക്കം പ്രതിഷേധാര്‍ഹമാണെന്ന് പ്രതിപക്ഷ ഉപനേതാവ് ഡോ. എം.കെ മുനീര്‍. കേരള ഹയര്‍സെക്കന്‍ഡറി ടീച്ചേഴ്‌സ് യൂനിയന്റെ (കെ.എച്ച്.എസ്.ടി.യു) മെംബര്‍ഷിപ്പ് ക്യാംപയിന്‍ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ചെലവ് ചുരുക്കലിനെക്കുറിച്ച് പഠിക്കാന്‍ നിയോഗിച്ച സമിതിയുടെ നിര്‍ദേശങ്ങള്‍ കേരളത്തിലെ വിദ്യാഭ്യാസ മേഖലയെ അടക്കം പിന്നോട്ട് വലിക്കാന്‍ കാരണമാകും. ജീവനക്കാരുടെയും അധ്യാപകരുടെയും ആനുകൂല്യങ്ങള്‍ കൊവിഡ് ഭീഷണി മറയാക്കി വെട്ടിച്ചുരുക്കി വിദ്യാഭ്യാസ ആരോഗ്യ മേഖലയില്‍ നിന്ന് പിന്നോക്കം പോകാനുള്ള സര്‍ക്കാര്‍ നീക്കത്തിനെതിരേ പൊതുസമൂഹവും ജീവനക്കാരും ജാഗ്രത പാലിക്കണമെന്നും അദ്ദേഹം ആവശ്യപ്പെട്ടു.

 സംസ്ഥാന പ്രസിഡന്റ് കെ.ടി അബ്ദുല്ലത്തീഫ് അധ്യക്ഷനായി. സി.ടി.പി ഉണ്ണിമൊയ്തീന്‍, നിസാര്‍ ചേലേരി, ഒ ഷൗക്കത്തലി, ഷമീം അഹമ്മദ്, സലാം കല്ലായി, കെ.കെ മുഹമ്മദ് അശ്‌റഫ്, മുഹമ്മദ് ജാസിം, സി.എ നുഹ്മാന്‍ ഷിബിലി,  കെ.കെ നവാസ്, കെ.ടി മുസ്തഫ, ആര്‍.കെ ഷാഫി സംസാരിച്ചു.