ആലപ്പുഴ: പൊലിസിന്റെയും തുറമുഖ വകുപ്പിന്റെയും ജീപ്പുകള്‍ ഒരേ ദിവസം മോഷ്ടിച്ച യുവാവ് പൊലിസ് പിടിയിലായി. ആലപ്പുഴ സക്കറിയ ബസാര്‍ തോട്ടുങ്കല്‍ നിസാര്‍ (34 ) ആണ് തൃശൂരില്‍ പിടിയിലായത്. വ്യാഴാഴ്ച രാവിലെയും രാത്രിയുമായിട്ടാണ് രണ്ടു മോഷണങ്ങളും നടന്നത്. തുറമുഖ വകുപ്പിന്റെ ജീപ്പ് ഹരിപ്പാടിനു സമീപം ഉപേക്ഷിച്ച ശേഷം അറ്റകുറ്റപ്പണിക്കായി കയറ്റിയിരുന്ന പൊലീസ് ജീപ്പ് ആലപ്പുഴയിലെ ഷോറൂമില്‍നിന്ന് രാത്രി മോഷ്ടിക്കുകയായിരുന്നു. പൊലിസ് ജീപ്പ് കടത്തികൊണ്ടുപോകുന്നതിനിടയിലാണ് മണ്ണൂത്തിയില്‍വച്ച് പിടിയിലായത്.