ചെന്നൈ: കോര്‍ചനോയ് സൂറിച് ചെസ്സ് ചാലഞ്ചില്‍ ഇന്ത്യയുടെ വിശ്വനാഥന്‍ ആനന്ദിന് മൂന്നാം സ്ഥാനം. അമേരിക്കയുടെ ഹികരു നകാമുറയാണ് ചാംപ്യന്‍. 13.5 പോയിന്റുകള്‍ നേടിയാണ് ആനന്ദ് മൂന്നാമതെത്തിയത്.
സിന്ധു മൂന്നാം റാങ്കില്‍
ന്യൂഡല്‍ഹി: ഇന്ത്യയുടെ ബാഡ്മിന്റണ്‍ താരം പി.വി സിന്ധുവിന് റാങ്കിങില്‍ മുന്നേറ്റം. കഴിഞ്ഞ ആഴ്ച രണ്ടാം റാങ്കില്‍ നിന്ന് അഞ്ചിലേക്ക് ഇറങ്ങിയ സിന്ധു ഏറ്റവും പുതിയ റാങ്കിങില്‍ രണ്ട് സ്ഥാനം മെച്ചപ്പെടുത്തി മൂന്നിലേക്ക് കയറി. സിംഗപ്പൂര്‍ ഓപണില്‍ ക്വാര്‍ട്ടറിലെത്തിയതാണ് സിന്ധുവിന് അനുകൂലമായത്. സൈന നേഹ്‌വാള്‍ ഒരു സ്ഥാനം മെച്ചപ്പെടുത്തി എട്ടിലേക്ക് കയറി. സിംഗപ്പൂര്‍ ഓപണിന്റെ ഫൈനലില്‍ ഏറ്റുമുട്ടിയ കെ ശ്രീകാന്തും ബി സായ് പ്രണീതും എട്ട് സ്ഥാനങ്ങള്‍ മെച്ചപ്പെടുത്തി 21, 22 റാങ്കുകളിലെത്തി. അജയ് ജയറാം 13ാം റാങ്കില്‍ തുടരുന്നു.
ദ്യുതി ചന്ദ് നയിക്കും
ന്യൂഡല്‍ഹി: ഏഷ്യന്‍ ഗ്രാന്‍ പ്രീ അത്‌ലറ്റിക്‌സ് മീറ്റിനുള്ള ഇന്ത്യന്‍ ടീമിനെ സ്പ്രിന്റര്‍ ദ്യുതി ചന്ദ് നയിക്കും. 16 അംഗ ടീമാണ് ഇന്ത്യക്കായി കളത്തിലിറങ്ങുന്നത്. ഈ മാസം 24 മുതല്‍ 27 വരെ ചൈനയിലെ ജിയാക്‌സിങ്, ജിനുവ നഗരങ്ങളിലാണ് മത്സരം. 400 മീറ്ററിലെ ദേശീയ റെക്കര്‍ഡുകാരനും മലയാളിയുമായ മുഹമ്മദ് അനസ്, 800 മീറ്ററില്‍ ടിന്റു ലൂക്ക, ലോങ് ജംപില്‍ നീന, ഹൈ ജംപില്‍ ജിനു മരിയ എന്നീ മലയാളികളും മത്സരിക്കാനിറങ്ങും.