കോഴിക്കോട്: കേന്ദ്രസര്‍ക്കാരിന്റെ ജനവിരുദ്ധമായ റെയില്‍വേ സ്വകാര്യവല്‍ക്കരണം ഉപേക്ഷിക്കണമെന്നും കോഴിക്കോട് റെയില്‍വേ സ്‌റ്റേഷന്‍ സ്വകാര്യവല്‍ക്കരിക്കാനുള്ള നീക്കം എന്തുവിലകൊടുത്തും ചെറുക്കുമെന്നും ഐ.എന്‍.ടി.യു.സി ജില്ലാ നേതൃകണ്‍വെന്‍ഷന്‍ അറിയിച്ചു.
ഇ.എസ്.ഐയുടെ തൊഴിലാളി ദ്രോഹ നടപടി പിന്‍വലിക്കണമെന്നും യോഗം ആവശ്യപ്പെട്ടു. മൂന്നുമാസം തുടര്‍ച്ചയായി സേവനത്തിലുണ്ടായിരിക്കുകയും 39 ദിവസത്തെ വിഹിതം അടക്കുകയും ചെയ്താല്‍ തൊഴിലാളികള്‍ക്ക് ലഭിച്ചിരുന്ന സൂപ്പര്‍ സ്‌പെഷ്യാലിറ്റി പരിരക്ഷയാണ് ഇപ്പോള്‍ രണ്ടുവര്‍ഷത്തെ സേവനവും 156 ദിവസത്തെ ഇ.എസ്.ഐ വിഹിതവുമാക്കി മാറ്റിമറിച്ചതെന്നും ഇത് തൊഴിലാളികള്‍ക്കും കുടുംബത്തിനും ദോഷകരമായി ബാധിക്കുമെന്നും യോഗം ചൂണ്ടിക്കാട്ടി. ഇന്‍ഡോര്‍ സ്‌റ്റേഡിയത്തില്‍ നടന്ന കണ്‍വെന്‍ഷനില്‍ ജില്ലാ പ്രസിഡന്റ് അഡ്വ. എം. രാജന്‍ അധ്യക്ഷനായി.