മനാമ: ബഹ്റൈനില്‍ ഫോര്‍മുലാ വണ്‍ കാറോട്ടമത്സരങ്ങള്‍ക്ക് തുടക്കമായി. ബഹ്‌റൈന്‍ ഇന്റര്‍നാഷണല്‍ സര്‍ക്യൂട്ടിലാണ് നയാനന്ദവും ആവേശകരവുമായ മത്സരം നടക്കുന്നത്.  
ആദ്യം യോഗ്യതാ മത്സരം, തുടര്‍ന്ന് കാറോട്ട മത്സരം എന്നിങ്ങിനെയാണ് ഫോര്‍മുലാ വണ്‍ നിശ്ചയിച്ചിരിക്കുന്നത്. ഇത്തവണ നാലുദിനങ്ങളിലായാണ് മത്സരം. കഴിഞ്ഞദിവസം മുതൽ യോഗ്യതാ മത്സരം ആരംഭിച്ചു. 

വിവിധ രാജ്യങ്ങളിൽനിന്നുള്ള മുൻനിര താരങ്ങളും കഴിഞ്ഞ വർഷങ്ങളിലെ കിരീട ജേതാക്കളും മത്സരത്തിൽ പെങ്കടുക്കുന്നുണ്ട്. 
മത്സരം വീക്ഷിക്കാനായി സ്പോർട്സ് താരങ്ങളും വിവിധ മേഖലകളിലുള്ള ബിസിനസ് പ്രമുഖരും വിനോദസഞ്ചാരികളും എത്തിയിട്ടുണ്ട്. വരും ദിവസങ്ങളിലും സന്ദർശക പ്രവാഹം ഉണ്ടാകുമെന്നാണ് പ്രതീക്ഷിക്കുന്നത്. 

മത്സരം റിപ്പോർട്ട് ചെയ്യാൻ വിദേശ മാധ്യമപ്രവർത്തകരും രംഗത്തുണ്ട്. മത്സരം കാണാൻ നിരവധി പേർ എത്തുന്നതിനാൽ, ബഹ്റൈൻ വിമാനത്താവളത്തിൽ കഴിഞ്ഞ ഏതാനും ദിവസങ്ങളിലായി നല്ല തിരക്കാണ്. മത്സരത്തിെൻറ ഭാഗമായി സുരക്ഷ കർശനമാക്കിയിട്ടുണ്ട്. മത്സരാർഥികൾക്കായി അതിവേഗ കാർഗോ സംവിധാനമാണ് ഏർപ്പെടുത്തിയത്. മത്സരം വീക്ഷിക്കാൻ എത്തുന്നവരടക്കമുള്ളവരുടെ സുരക്ഷ ഉറപ്പാക്കാൻ ഏറ്റവും മികച്ച സംവിധാനങ്ങളാണുള്ളത്. ട്രാഫിക് ഡയറക്ടറേറ്റും ഇതര സര്‍ക്കാര്‍ സംവിധാനങ്ങളുമായി സഹകരിച്ചാണ് ഇതിനായുള്ള പ്രവര്‍ത്തനം ഏകോപിപ്പിച്ചത്.

മത്സരം വീക്ഷിക്കാനെത്തുന്നവര്‍ക്ക് എളുപ്പത്തില്‍ ഇമിഗ്രേഷന്‍ നടപടികള്‍ പൂര്‍ത്തിയാക്കുന്നതിന് ബഹ്‌റൈന്‍ അന്താരാഷ്ട്ര വിമാനത്താവളത്തില്‍ ആരംഭിച്ച പ്രത്യേക കൗണ്ടറുകളും സജീവമാണ്. 24 മണിക്കൂറും വിമാനത്താവളത്തില്‍നിന്ന് സര്‍ക്യൂട്ടിലേക്കും തിരിച്ചും ഗതാഗതസൗകര്യം ഏര്‍പ്പെടുത്തിയിട്ടുണ്ട്. സ്വകാര്യ ജെറ്റുകളും ചാര്‍ട്ടേര്‍ഡ് ഫ്‌ലൈറ്റുകളും വരും ദിവസങ്ങളില്‍ കൂടുതലെത്തുമെന്നാണ് പ്രതീക്ഷിക്കുന്നത്.