ഇരിക്കൂര്‍: വിവാഹ പാര്‍ട്ടി സഞ്ചരിച്ച വാഹനം നിയന്ത്രണം വിട്ടു മരത്തിലിടിച്ച് 11 പേര്‍ക്ക് പരുക്കേറ്റു. ഇരിക്കൂര്‍ നിലാമുറ്റത്തിനടുത്ത് ഏട്ടക്കയം സ്വദേശികള്‍ സഞ്ചരിച്ച വാഹനമാണ് മാക്കൂട്ടം ചുരത്തില്‍ അപകടത്തില്‍പ്പെട്ടത്.  കെ. സൈഫുദീന്റെ വിവാഹ പാര്‍ട്ടി വധുഗൃഹമായ വീരാജ്‌പേട്ടയിലേക്ക് പോയി വധുവിനെയും കൂട്ടി വരുന്നതിനിടെയാണ് അപകടം. ഇടിയുടെ ആഘാതത്തില്‍ വാഹനത്തിലുണ്ടായിരുന്ന ഖാലിദ് (36), സൈനബ (52) എന്നിവരെ ഗുരുതര പരുക്കുകളോടെ പരിയാരം മെഡിക്കല്‍ കോളജില്‍ പ്രവേശിപ്പിച്ചു. പരുക്കേറ്റ നുസൈബ (30)യെ കണ്ണൂരിലെ സ്വകാര്യ ആശുപത്രിയിലും നിസാരപരുക്കേറ്റവരെ ഇരിട്ടിയില്‍ പ്രാഥമിക ശ്രുശൂശ നല്‍കി വിട്ടയച്ചു. ഇന്നലെ വൈകിട്ടോടെയായിരുന്നു അപകടം.