കൊല്ലം: കൊല്ലം-തിരുവനന്തപുരം പാസഞ്ചര്‍ ട്രെയിന്‍ കൊല്ലം റെയില്‍വേ സ്റ്റേഷനില്‍ പാളംതെറ്റി. ഇന്നലെ രാവിലെയുണ്ടായ സംഭവത്തില്‍ ആളപായമില്ല. റെയില്‍വേ അന്വേഷണം പ്രഖ്യാപിച്ചു. രാവിലെ 6.55ന് നിറയെ യാത്രക്കാരുമായി പുറപ്പെട്ട 56307-ാം നമ്പര്‍ പാസഞ്ചര്‍ ട്രെയിന്‍ മൂന്നാം നമ്പര്‍ പ്ലാറ്റ്‌ഫോമില്‍ നിന്ന് നീങ്ങിത്തുടങ്ങിയപ്പോഴായിരുന്നു സംഭവം. പത്തുമീറ്റര്‍ നീങ്ങിയ ഉടന്‍ പാളം തെറ്റുകയായിരുന്നു. ട്രെയിന്‍ നിര്‍ത്തിയിടുമ്പോള്‍ ചക്രങ്ങള്‍ക്കടിയില്‍ സ്ഥാപിക്കുന്ന ഉപകരണം കുരുങ്ങിയായിരുന്നു അപകടം. ട്രെയിന്‍ നീങ്ങിത്തുടങ്ങിയപ്പോള്‍ തന്നെ എന്‍ജിന്റെ മുന്‍ചക്രം തെന്നിമാറി. പിന്നാലെ പുറകിലത്തെ ചക്രങ്ങളും ട്രാക്കിന് വെളിയില്‍പ്പോയി.
സുരക്ഷാ അലാറം മുഴക്കി ഉടന്‍ തന്നെ യാത്രക്കാരെ ട്രെയിനില്‍ നിന്ന് മാറ്റി. തുടര്‍ന്ന് എന്‍ജിനീയറിങ് വിഭാഗമെത്തി ആദ്യം ബോഗികള്‍ പാളത്തില്‍ നിന്ന് മാറ്റി. വളരെ നേരത്തെ പരിശ്രമത്തിനൊടുവിലാണ് എന്‍ജിന്‍ ട്രാക്കിലേക്ക് മാറ്റാനായത്. തിരുവനന്തപുരത്തു നിന്ന് ആക്‌സിഡന്റ് റിലീഫ് ട്രെയിന്‍ എത്തിച്ചായിരുന്നു പുറത്തായ ചക്രങ്ങള്‍ പാളത്തിലേക്ക് മാറ്റിയത്. ട്രെയിന്‍ നിര്‍ത്തിയപ്പോള്‍ മുന്‍ഭാഗത്ത് സ്ഥാപിച്ചിരുന്ന തടികൊണ്ടുള്ള ഉപകരണം മാറ്റാത്തതാണ് പാളം തെറ്റാന്‍ കാരണമെന്ന് പ്രാഥമിക അന്വേഷണത്തില്‍ കണ്ടെത്തി. ഓപ്പറേഷന്‍ വിഭാഗമാണ് ഇത് ചെയ്യേണ്ടത്. ട്രെയിനിന്റെ വേഗത കുറവായതിനാലാണു വന്‍ ദുരന്തം ഒഴിവായത്.
അന്വേഷണസംഘം മൂന്നുദിവസത്തിനകം റിപ്പോര്‍ട്ട് സമര്‍പ്പിക്കും. പാസഞ്ചറിന്റെ സര്‍വിസ് റദ്ദാക്കിയതിനെ തുടര്‍ന്ന് മലബാര്‍ എക്‌സ്പ്രസിന് കൊല്ലത്തിനും തിരുവനന്തപുരത്തിനുമിടയില്‍ എല്ലാ സ്റ്റേഷനുകളിലും സ്റ്റോപ്പ് അനുവദിച്ചിരുന്നു. അന്വേഷണ റിപ്പോര്‍ട്ട് ലഭിച്ചശേഷം സംഭവത്തെ കുറിച്ച് പ്രതികരിക്കാമെന്ന് തിരുവനന്തപുരം ഡി.ആര്‍.എം സിരീഷ്‌കുമാര്‍ സിന്‍ഹ പറഞ്ഞു.