കൊല്ലം: മൂന്നാമതു സംസ്ഥാന യോഗ ചാംപ്യന്‍ഷിപ്പിന് മുന്നോടിയായി ജില്ലാ ചാംപ്യന്‍ഷിപ്പ് മത്സരങ്ങള്‍ നാളെ നടക്കും. ആശ്രാമം ഹോക്കി സ്റ്റേഡിയത്തില്‍ നടക്കുന്ന മത്സരങ്ങളുടെ ഉദ്ഘാടനം മന്ത്രി ജെ. മേഴ്‌സിക്കുട്ടിയമ്മ നിര്‍വഹിക്കും. മേയര്‍ വി. രാജേന്ദ്രബാബു അധ്യക്ഷനാകും.
കൊല്ലം ജില്ലാ യോഗ അസോസിയേഷന്‍ന്റെയും സ്‌പോര്‍ട്ട് കൗണ്‍സിലിന്റെയും ആഭിമുഖ്യത്തില്‍ ഏഴു വിഭാഗങ്ങളിലായാണു മത്സരം. 10 ഇനങ്ങളിലായി 60ഓളം ക്ലബുകളെ പ്രതിനിധീകരിച്ച് 300ഓളം മത്സരാര്‍ഥികള്‍ പങ്കെടുക്കും. കൂടാതെ പ്രൊഫഷനല്‍ യോഗ മത്സരങ്ങളും ഒരുക്കിയിട്ടുണ്ട്. ഓരോ വിഭാഗത്തിലുമുള്ള മത്സരത്തില്‍ ഒന്നും രണ്ടും സ്ഥാനങ്ങള്‍ കരസ്ഥമാക്കുന്നവര്‍ക്കാകും 28, 29 തിയതികളിലായി കണ്ണൂരില്‍ നടക്കുന്ന സംസ്ഥാനതല ചാംപ്യന്‍ഷിപ്പില്‍ പങ്കെടുക്കാന്‍ അവസരം ലഭിക്കുമെന്നു ജെ.എസ് ഗോപന്‍, എം.എ സത്താര്‍, ബി. ചന്ദ്രസേനന്‍ എന്നിവര്‍ വാര്‍ത്താ സമ്മേളനത്തില്‍ അറിയിച്ചു.