കോഴിക്കോട്: ബസ് യാത്രക്കിടെ രണ്ടുവയസുകാരിയുടെ പാദസരം കവരാന്‍ ശ്രമിച്ച രണ്ടു തമിഴ്‌നാട് സ്വദേശിനികള്‍ അറസ്റ്റില്‍.
മധുര സ്വദേശിനികളായ വാടിപ്പെട്ടി മുരുകേശിന്റെ ഭാര്യ പ്രിയ (22), ശബരിയുടെ ഭാര്യ ശാവാലിനി (25) എന്നിവരെയാണ് കുന്ദമംഗം എസ്.ഐ കൈലാസനാഥും സംഘവും അറസ്റ്റ് ചെയ്തത്. ഇന്നലെ രാവിലെ ഓടക്കുന്ന് നിന്നു പടനിലത്തേക്ക് യാത്ര ചെയ്യുകയായിരുന്ന യുവതിയുടെ മകളുടെ പാദസരമാണ് ഇവര്‍ കവരാന്‍ ശ്രമിച്ചത്. ഭര്‍ത്താവിന്റെ വീട്ടിലേക്ക് പോകുന്നതിനിടെ പടനിലത്ത് ബസിറങ്ങാനായി എഴുന്നേറ്റപ്പോള്‍ പ്രതികളിലൊരാള്‍ പരാതിക്കാരിയുടെ മകളുടെ വലത്തേ കാലിലെ പാദസ്വരത്തിന്റെ കൊളുത്ത് വിടര്‍ത്തി കൂടെയുള്ള രണ്ടാമത്തെ സ്ത്രീക്ക് കൊടുക്കുകയും പരാതിക്കാരിയും മറ്റൊരു സ്ത്രീയും സംഭവം കണ്ടപ്പോള്‍ മോഷ്ടാക്കള്‍ പാദസ്വരം നിലത്തേയ്ക്കിടുകയും ചെയ്‌തെന്ന് പൊലിസ് പറഞ്ഞു.
പ്രതികള്‍ സമാന കേസുകളില്‍ ഉള്‍പ്പെട്ടിട്ടുണ്ടോയെന്ന് അന്വേഷിച്ചു വരികയാണെന്ന് നോര്‍ത്ത് എ.സി പ്രിഥ്വിരാജന്‍ അറിയിച്ചു. കോടതിയില്‍ ഹാജരാക്കിയ പ്രതികളെ രണ്ടാഴ്ചത്തേക്ക് റിമാന്‍ഡ് ചെയ്തു.