ബെര്‍ലിന്‍: ബൊറൂസിയ ഡോര്‍ട്മുണ്ട് ടീമിന്റെ ബസിനെതിരേ നടന്ന ആക്രമണത്തിന് ഭീകരവാദവുമായി ബന്ധമില്ലെന്ന് പൊലിസ്. കേസില്‍ ഊഹക്കച്ചവടക്കാരനായ യുവാവിനെ പൊലിസ് പിടികൂടി. 28 കാരനായ സെര്‍ജി ഡബ്ല്യു ആണ് പിടിയിലാണ്.
തെരുവിലെ സ്‌ഫോടനം കാണാന്‍ പ്രതി കളിക്കാര്‍ താമസിച്ച ഹോട്ടലില്‍ തന്നെ കഴിഞ്ഞുവെന്ന് പൊലിസ് പറഞ്ഞു. ഷെയര്‍മാര്‍ക്കറ്റിലെ ഓഹരി വിപണിയില്‍ നേട്ടമുണ്ടാക്കാനാണ് ആക്രമണം നടത്തിയതെന്നാണ് കുറ്റസമ്മത മൊഴി.
താരങ്ങള്‍ സഞ്ചരിച്ച ബസിനുസമീപത്തെ സ്‌ഫോടനത്തില്‍ രണ്ടുപേര്‍ക്ക് പരുക്കേറ്റിരുന്നു. സ്പാനിഷ് ഫുട്‌ബോള്‍ താരം മാര്‍ക് ബര്‍ട്രയെ ശസ്ത്രക്രിയക്ക് വിധേയനാക്കി. കഴിഞ്ഞ11 നാണ് ആക്രമണം നടന്നത്. തുടര്‍ന്ന് ഡോര്‍ട്മുണ്ട് ചാംപ്യന്‍സ് ലീഗ് മത്സരം മാറ്റിവച്ചിരുന്നു. മൂന്നു സ്‌ഫോടക വസ്തുക്കളാണ് ബസിനു സമീപം സ്ഥാപിച്ചിരുന്നത്.
ഐ.എസാണ് ആക്രമണത്തിനു പിന്നിലെന്നും 25കാരനായ ഇറാഖ് വംശജനാണ് പിടിയിലായതെന്നും ആദ്യ റിപ്പോര്‍ട്ടുകളുണ്ടായിരുന്നു.
ഐ.എസുമായി ബന്ധമുള്ള കടലാസും സംഭവസ്ഥലത്തു നിന്ന് ലഭിച്ചിരുന്നു. ആക്രമണം നടത്തിയത് ഐ.എസാണെന്ന് വരുത്തിതീര്‍ക്കാനും അന്വേഷണം വഴിതിരിച്ചുവിടാനുമാണ് ഇതുചെയ്തതെന്ന് പൊലിസ് പറഞ്ഞു.
ജര്‍മന്‍,റഷ്യന്‍ ഇരട്ട പൗരത്വമുള്ളയാളാണ് പ്രതി. വധശ്രമത്തിനാണ് ഇയാള്‍ക്കെതിരേ കേസെടുത്തത്. സ്‌ഫോടനം നടത്തി, ശാരീരികമായി പരുക്കേല്‍പിച്ചു എന്നീ വകുപ്പുകളും ചുമത്തിയിട്ടുണ്ട്.
വെള്ളിയാഴ്ച പടിഞ്ഞാറന്‍ ജര്‍മനിയില്‍ വച്ചാണ് ജി.എസ്.ജി 9 പൊലിസ് യൂനിറ്റ് പ്രതിയെ പിടികൂടിയത്.