മീനങ്ങാടി: പോളിടെക്‌നിക് ഈവനിങ് ക്ലാസുകള്‍ കുത്തഴിഞ്ഞ നിലയില്‍. പതിനായിരങ്ങള്‍ മുടക്കി കോഴ്‌സിന് ചേര്‍ന്ന വിദ്യാര്‍ഥികള്‍ക്ക് ക്ലാസുകള്‍ ലഭിക്കുന്നില്ലെന്ന പരാതി വ്യാപകം. സിവില്‍, മെക്കാനിക്കല്‍, ഇലക്ട്രിക്കല്‍ വിഭാഗങ്ങളിലായി മൂന്ന് വര്‍ഷത്തെ കോഴ്‌സാണ് ഈവനിങ് ക്ലാസിലൂടെ നല്‍കുന്നത്. ഒരു കോഴ്‌സ് പൂര്‍ത്തിയാകുമ്പോഴേക്കും അന്‍പതിനായിരത്തോളം രൂപയാണ് ഫീ ഇനത്തില്‍ ഈടാക്കുന്നത്. വൈകിട്ട് അഞ്ച് മുതല്‍ രാത്രി ഒന്‍പത് വരെയാണ് ക്ലാസ് നടക്കുന്നത്. ഓരോ ദിവസവും ഓരോ കാരണത്താല്‍ ക്ലാസ് നഷ്ടപ്പെടുകയാണ്. വൈദ്യുതി ഇല്ലാത്ത സമയങ്ങളില്‍ ജനറേറ്ററുണ്ടായിട്ടും ക്ലാസ് മുടങ്ങുന്നത് പതിവാണ്. അധ്യാപകരില്ലാത്ത സമയങ്ങളില്‍ ക്ലാസില്ലെന്ന് പറഞ്ഞ് വിദ്യാര്‍ഥികളെ തിരിച്ചയക്കുകയാണ് പതിവ്. മൂന്ന് ബാച്ചുകളിലായി ഒന്‍പത് ട്രേഡുകളിലാണ് ക്ലാസുകള്‍ നടക്കേണ്ടത്. ഈവനിങ് ബാച്ചില്‍ വിജയ ശതമാനം കുറവാണെന്ന പരാതിക്ക് കാരണം ഈ അനാസ്ഥ തന്നെയാണന്ന് രക്ഷിതാക്കളും ആരോപിക്കുന്നു.