കൊല്ലം: വയനാട്ടിലെ എന്‍.ഡി.എ സ്ഥാനാര്‍ഥി തുഷാര്‍ വെള്ളാപ്പള്ളി എസ്.എന്‍.ഡി.പി യോഗം വൈസ് പ്രസിഡന്റ് സ്ഥാനം രാജിവയ്ക്കണമെന്ന് എസ്.എന്‍.ഡി.പി യോഗം സംരക്ഷണസമിതി ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു.

തെരഞ്ഞെടുപ്പില്‍ മത്സരിക്കുന്ന യോഗം ഭാരവാഹികള്‍ പദവി രാജിവച്ചായിരിക്കും മത്സരിക്കുകയെന്നു പറഞ്ഞ വെള്ളാപ്പള്ളി നടേശന്‍ ഇപ്പോള്‍ നിലപാട് മാറ്റിയിരിക്കുകയാണ്. മകനെ മത്സരത്തിന് അനുഗ്രഹിച്ച് പറഞ്ഞയച്ച വെള്ളാപ്പള്ളിക്ക് ഇപ്പോള്‍ മിണ്ടാട്ടമില്ല. തുഷാറിന്റെ രാജി ആവശ്യവുമായി എസ്.എന്‍.ഡി.പി യോഗം സംരക്ഷണ സമിതി വയനാട്ടില്‍ പ്രചാരണം നടത്തും. വയനാട്ടിലെ സമുദായാംഗങ്ങള്‍ക്കിടയില്‍ ഒരു സ്വാധീനവും ചെലുത്താന്‍ തുഷാറിനു കഴിയില്ല. വയനാട്ടിലെ മത്സരം പാണ്ടിലോറിയും തവളയും തമ്മിലുള്ളതു പോലെയാണെന്നും നേതാക്കള്‍ പറഞ്ഞു. വാര്‍ത്താസമ്മേളനത്തില്‍ ഡി. പ്രഭ, കടകമ്പള്ളി മനോജ്, അഡ്വ. ആര്‍. ചന്ദ്രസേനന്‍, ഡോ. ആര്‍. മണിയപ്പന്‍, പാട്ര രാഘവന്‍ എന്നിവര്‍ പങ്കെടുത്തു.