പൊന്നാനി: പൊന്നാനി തഹസില്‍ദാര്‍ക്കു നേരെ കല്ലേറ്. സംഭവത്തില്‍ തഹസില്‍ദാര്‍ തലനാരിഴയ്ക്കു രക്ഷപ്പെട്ടു. ഇന്നലെ വൈകിട്ട് മൂന്നോടെയാണ് മിനി സിവില്‍ സ്റ്റേഷനില്‍ പ്രവര്‍ത്തിക്കുന്ന തഹസില്‍ദാറിന്റെ ഓഫിസിനു നേരെ കല്ലേറുണ്ടായത്.
കല്ലേറില്‍ ഓഫിസിന്റെ ജനല്‍ചില്ല് തകര്‍ന്നു. കര്‍ട്ടനില്‍തട്ടി കല്ല് പുറത്തേക്കു തെറിച്ചതിനാല്‍ തഹസില്‍ദാര്‍ പരുക്കേല്‍ക്കാതെ രക്ഷപ്പെടുകയായിരുന്നു. കല്ലെറിഞ്ഞ ആളെ പിടികിട്ടിയിട്ടില്ല. ഇതിനു മുന്‍പും ഓഫിസില്‍ സാമൂഹ്യവിരുദ്ധര്‍ ആക്രമണം നടത്തിയിരുന്നു. രണ്ടാഴ്ച മുന്‍പ് ഓഫിസിലെ കംപ്യൂട്ടര്‍ മോഷണം പോകുകയും ചെയ്തിരുന്നു. ഇതു പിന്നിട് സിവില്‍ സ്റ്റേഷന്റെ പിറകുവശത്തുനിന്നു കണ്ടെടുത്തു.
സുരക്ഷിതമായി ഓഫിസിലിരുന്നു ജോലിചെയ്യാന്‍  കഴിയാത്ത സാഹചര്യമാണ് പൊന്നാനിയിലുള്ളതെന്നു തഹസില്‍ദാര്‍ പറയുന്നു. സംഭവത്തില്‍ പൊന്നാനി പൊലിസ് കേസെടുത്തിട്ടുണ്ട്. മിനി സിവില്‍ സ്റ്റേഷന്‍ കെട്ടിടത്തിനു പൂര്‍ണമായി ചുറ്റുമതില്‍ ഇല്ലാത്തതിനാല്‍ സാമൂഹ്യവിരുദ്ധര്‍ക്കു കാര്യങ്ങള്‍ എളുപ്പമാണ്. തഹസില്‍ദാര്‍ പിടികൂടുന്ന വാഹനങ്ങളില്‍നിന്നു ബാറ്ററി, മറ്റ് ഉപകരണങ്ങള്‍, മണല്‍ എന്നിവ മോഷണംപോകുന്നതും പതിവാണ്. ഇതിനെതിരേ വിവിധ വകുപ്പുകള്‍ പൊലിസില്‍ പരാതി നല്‍കിയിട്ടും ഫലമുണ്ടായിട്ടില്ല.