കല്‍പ്പറ്റ: ജില്ലയിലെ പൂട്ടിയ ബീവറേജസ് ഔട്ട്‌ലറ്റുകളും ബിയര്‍ വൈന്‍ പാര്‍ലറുകളും തുറക്കാന്‍ അണിയറയില്‍ നീക്കം സജീവം. കല്‍പ്പറ്റയിലെ സ്വകാര്യ ബിയര്‍-വൈന്‍ പാര്‍ലറുകള്‍ ഉള്‍പെടെ തിങ്കളാഴ്ചയോടെ പ്രവര്‍ത്തനമാരംഭിക്കുമെന്നാണറിയുന്നത്.
 നിലവില്‍ ദേശീയപാതയില്‍ നിന്ന് 500 മീറ്റര്‍ പരിധിയിലാണ് കല്‍പ്പറ്റയിലെ  ബിയര്‍-വൈന്‍ പാര്‍ലറുകള്‍ പ്രവര്‍ത്തിക്കുന്നത്.
ഇവരെ സഹായിക്കാന്‍ ബൈപ്പാസ് റോഡ് ദേശീയപാതയാക്കി മാറ്റി ദേശീയപാതയിലുള്‍പ്പെട്ട കല്‍പ്പറ്റ ടൗണ്‍ റോഡ് ജില്ലാ പാതയാക്കാനുള്ള നീക്കമാണ് അണിയറയില്‍ നടക്കുന്നത്. കൂടാതെ വൈത്തിരിയില്‍ നിന്ന് പുഴമുടിയിലേക്ക് മാറ്റിയ ബീവറേജസ് ഔട്ട്‌ലറ്റും അടുത്തദിവസങ്ങളില്‍ പ്രവര്‍ത്തനമാരംഭിക്കും. സ്വകാര്യ വ്യക്തിയുടെ വീട്ടിലേക്കാണ് അധികൃതര്‍ മദ്യശാല മാറ്റിയിരുന്നത്. വ്യാപാര ആവശ്യങ്ങള്‍ക്കായി വീട് ഉപയോഗിക്കാനുള്ള ലൈസന്‍സ് ഇല്ലാത്തതിനെ തുടര്‍ന്നാണ് പ്രവര്‍ത്തനം തുടങ്ങിയ ഔട്ട്‌ലറ്റ് വീണ്ടും പൂട്ടാന്‍ കാരണം.
എന്നാല്‍ ഇതിന് ലൈസന്‍സ് ലഭിച്ചതായാണ് വിവരം. അഡ്വാന്‍സ് ഇനത്തില്‍ 20 ലക്ഷം രൂപയാണ് വീട്ടുടമക്ക് അധികൃതര്‍ നല്‍കിയിരിക്കുന്നത്.
75000 രൂപ മാസ വാടകക്കാണ് വീട് ബെവ്‌കോ അധികൃതര്‍ക്ക് കൈമാറിയിരിക്കുന്നത്. ഭരണാനുകൂല വിദ്യാര്‍ഥി സംഘടനകള്‍ ഉള്‍പെടെ പുഴമുടിയില്‍ മദ്യശാല സ്ഥാപിക്കുന്നതിനെതിരേ രംഗത്തെത്തിയിരുന്നു.
ജില്ലയില്‍ ഏറ്റവും കൂടുതല്‍ വിറ്റുവരവുള്ള മാനന്തവാടി-വള്ളിയൂര്‍ക്കാവ് റോട്ടിലെ മദ്യശാല നിലനിര്‍ത്താന്‍ നേരത്തെ അധികൃതര്‍ സംസ്ഥാന പാത മാറ്റി കൃത്രിമം കാണിച്ചിരുന്നു.
ഇതേ രീതിയിലാണ് കല്‍പ്പറ്റയിലും അണിയറ നീക്കം നടക്കുന്നത്. കല്‍പ്പറ്റ ബൈപ്പാസ് റോഡ് ജില്ലാ പാതയായാല്‍ നേരത്തെ ടൗണില്‍ പ്രവര്‍ത്തിച്ചിരുന്ന മദ്യശാല വീണ്ടും ടൗണില്‍ മറ്റെവിടെയെങ്കിലും സ്ഥാപിക്കാനും അധികൃതര്‍ക്ക് പദ്ധതിയുണ്ട്.
വരുമാനം മാത്രം ലക്ഷ്യമിട്ടുള്ള സര്‍ക്കാരിന്റെ മദ്യനയം ഭാവിയില്‍ ദൂരവ്യാപകമായ പ്രത്യാഘാതങ്ങളുണ്ടാക്കുമെന്ന ആക്ഷേപം ശക്തമാണ്.