തൊടുപുഴ: ഇടുക്കി പദ്ധതിയുടെ മൂലമറ്റം പവര്‍ ഹൗസിലെ ഒന്നാം നമ്പര്‍ ജനറേറ്റര്‍ നവീകരണം പൂര്‍ത്തിയായി. ട്രയല്‍ റണ്‍ നടത്തി പൂര്‍ണ തോതിലുള്ള ഉല്‍പാദനം ഒരാഴ്ചയ്ക്കുള്ളില്‍ ആരംഭിക്കാന്‍ കഴിയുമെന്നാണ് കെ.എസ്.ഇ.ബി പ്രതീക്ഷിക്കുന്നത്.
തുടര്‍ച്ചയായി 72 മണിക്കൂര്‍ പൂര്‍ണ ശേഷിയായ 130 മെഗാവാട്ടില്‍ ഗ്രിഡില്‍ ബന്ധിപ്പിച്ചുള്ള ടെസ്റ്റ് റണ്‍ പൂര്‍ത്തിയാക്കിയ ശേഷമേ ഉല്‍പാദനം തുടങ്ങാന്‍ കഴിയൂ. സ്റ്റേറ്റര്‍ വൈന്‍ഡിങ്, റോട്ടര്‍ പോളുകള്‍, ബിയറിങ്ങുകള്‍ എന്നിവയുടെ പരിശോധനകള്‍ പൂര്‍ത്തിയാക്കി.
ജനറേറ്റര്‍ നവീകരണം അവസാന ഘട്ടത്തിലെത്തി നില്‍ക്കെയാണ് ലോക്ക് ഡൗണ്‍ പ്രഖ്യാപിച്ചത്. ഇതോടെ നവീകരണ പ്രവര്‍ത്തനങ്ങള്‍ മുടങ്ങുകയായിരുന്നു. നിയന്ത്രണങ്ങളില്‍ ഇളവു വരുത്തിയതോടെ ജൂണ്‍ ഒന്നിനാണ് പണികള്‍ പുനരാരംഭിച്ചത്. മൂന്നാം നമ്പര്‍ ജനറേറ്റര്‍ നവീകരണം കഴിഞ്ഞ വര്‍ഷം പൂര്‍ത്തിയാക്കിയിരുന്നു. 1976 ല്‍ കമ്മിഷന്‍ ചെയ്ത ഒന്നാംഘട്ട ജനറേറ്ററുകളില്‍ ഇനി രണ്ടാം നമ്പര്‍ ജനറേറ്ററാണ് നവീകരിക്കാനുള്ളത്.

ഇത് ഉടന്‍ ആരംഭിക്കും. ആധുനിക സാങ്കേതിക വിദ്യയുടെ സഹായത്താല്‍ നവീകരിച്ച ജനറേറ്ററുകള്‍ സുഗമവും സുരക്ഷിതവും ആയിട്ടുള്ള പ്രവര്‍ത്തനവും കൂടുതല്‍ കാര്യക്ഷമതയും ഉറപ്പുവരുത്തുന്നു. നവീകരണ പ്രവര്‍ത്തനങ്ങളുടെ കരാര്‍ എടുത്തിരിക്കുന്നത് ജി.ഇ പവര്‍ ഇന്ത്യ ലിമിറ്റഡ് കമ്പനിയാണ്. പൂര്‍ണമായും കെ.എസ്.ഇ.ബിയുടെ മേല്‍നോട്ടത്തിലാണ് പ്രവര്‍ത്തനങ്ങള്‍ നടക്കുന്നത്.
130 മെഗാവാട്ട് വീതം ശേഷിയുള്ള മൂന്നു ജനറേറ്ററുകള്‍ ഉള്‍പ്പെടെയുള്ള യന്ത്രസാമഗ്രികള്‍ മൂന്നു വര്‍ഷംകൊണ്ടു നവീകരിക്കാനാണ് വൈദ്യുതി ബോര്‍ഡ് പദ്ധതി. വൈദ്യുതി ഉല്‍പാദനത്തെ ബാധിക്കാത്ത വിധത്തില്‍ ജൂണ്‍ മുതല്‍ ഡിസംബര്‍ വരെ ഓരോ ജനറേറ്റര്‍ നവീകരിക്കാനായിരുന്നു പദ്ധതിയെങ്കിലും വിവിധ കാരണങ്ങളാല്‍ ഇതില്‍ പാളിച്ച വന്നു.
ഒന്നാംഘട്ടത്തില്‍ 390 മെഗാവാട്ട് സ്ഥാപിത ശേഷിയുള്ള മൂന്നു ജനറേറ്ററുകളാണുള്ളത്. ബംഗളുരുവിലെ സെന്‍ട്രല്‍ പവര്‍ റിസര്‍ച്ച് ഇന്‍സ്റ്റിറ്റ്യൂട്ടിന്റെ ആര്‍.എല്‍.എ (റെസിഡ്യുവല്‍ ലൈഫ് അനാലിസിസ്) പഠന റിപ്പോര്‍ട്ടിന്റെ അടിസ്ഥാനത്തിലാണ് നവീകരണം. നവീകരണത്തിനു കേന്ദ്ര വൈദ്യുതി അതോറിട്ടിയും നിര്‍ദേശം നല്‍കിയിരുന്നു.
1985 നവംബര്‍ നാലിനു കമ്മിഷന്‍ ചെയ്ത രണ്ടാംഘട്ടത്തിലെ മൂന്നു ജനറേറ്ററുകള്‍ നവീകരിക്കാന്‍ സമയമായിട്ടില്ലെന്നാണു വിലയിരുത്തല്‍. 1976 ഫെബ്രുവരി 12 ന് അന്നത്തെ പ്രധാനമന്ത്രി ഇന്ദിരാഗാന്ധിയാണു സംസ്ഥാനത്തെ ഏറ്റവും വലിയ ജലവൈദ്യുതി പദ്ധതിയായ ഇടുക്കിയുടെ ഒന്നാംഘട്ട പദ്ധതി കമ്മിഷന്‍ ചെയ്തത്.