മൂന്നുപേര്‍ അറസ്റ്റില്‍
മുണ്ടക്കയം: പ്രായപൂര്‍ത്തിയാകാത്ത രണ്ടു പെണ്‍കുട്ടികള്‍ ആത്മഹത്യയ്ക്കു ശ്രമിച്ച സംഭവത്തില്‍ മൂന്ന് പേര്‍ അറസ്റ്റില്‍. പോക്‌സോ നിയമപ്രകാരമാണ് അറസ്റ്റ്. പതിനഞ്ച് വയസുകാരിയും ഒപ്പമുണ്ടായിരുന്ന സുഹൃത്തായ പെണ്‍കുട്ടിയും വിഷം കഴിച്ച ശേഷം മണിമലയാറ്റില്‍ ചാടി ആത്മഹത്യക്ക് ശ്രമിച്ച സംഭവത്തില്‍ നടത്തിയ അന്വേഷണമാണ് യുവാക്കളായ പ്രതികളുടെ അറസ്റ്റിലേക്ക് നയിച്ചത്.
കോരുത്തോട് മടുക്ക സ്വദേശികളായ, അനന്ദു (20), മഹേഷ് (20), എരുമേലി ചെറുവള്ളി എസ്‌റ്റേറ്റ് സ്വദേശി രാഹുല്‍ രാജ് (20) എന്നിവരെയാണ് അറസ്റ്റ് ചെയ്തത്. പ്രതികള്‍ മൂവരും പ്രണയം നടിച്ചാണ് പെണ്‍കുട്ടിയെ പീഡിപ്പിച്ചത്. കഴിഞ്ഞ തിങ്കളാഴ്ചയാണ് സ്‌കൂള്‍ വിദ്യാര്‍ഥികളായ രണ്ട് പെണ്‍കുട്ടികള്‍ എലിവിഷം കഴിച്ച ശേഷം മുണ്ടക്കയം വെളളനാടി വള്ളക്കടവ് പാലത്തില്‍ നിന്ന് മണിമലയാറിലേക്ക് ചാടി ആത്മഹത്യക്ക് ശ്രമിച്ചത്. ഫോണില്‍ ഫോട്ടോ എടുത്തതുമായി ബന്ധപ്പെട്ട് വീട്ടില്‍ വഴക്ക് പറഞ്ഞതോടെ ആത്മഹത്യയ്ക്ക് ശ്രമിക്കുകയായിരുന്നു എന്നാണ് കോരുത്തോട്, മടുക്ക സ്വദേശിനികളായ പെണ്‍കുട്ടികള്‍ പൊലിസിന് മൊഴി നല്‍കിയത്. എന്നാല്‍, ഇതില്‍ ദുരൂഹത തോന്നിയ പൊലിസ് ഇരുവരെയും വൈദ്യപരിശോധ നയ്ക്ക് വിധേയരാക്കിയതോടെയാണ് സംഭവത്തിന്റെ ചുരുളഴിയുന്നത്. ഒരു പെണ്‍കുട്ടി ലൈംഗിക ചൂഷണത്തിന് ഇരയായെന്ന് വ്യക്തമായതോടെ പൊലിസ് പോക്‌സോ നിയമപ്രകാരം കേസെടുത്തു. തുടര്‍ന്ന് പെണ്‍കുട്ടികളെ കൗണ്‍സിലിങിന് വിധേയരാക്കിയതോടെയാണ് പീഡന വിവരം പുറത്തറിയുന്നതും യുവാക്കളെ അറസ്റ്റ് ചെയ്തതും. പെണ്‍കുട്ടികളുടെ മൊബൈലുകള്‍ പരിശോധിച്ചത് പ്രതികളിലേക്ക് എത്താന്‍ പൊലിസിന് സഹായകരമായി. രാഹുല്‍ രാജാണ് ഏഴാം ക്ലാസ് വിദ്യാര്‍ഥിനിയായിരിക്കെ പെണ്‍കുട്ടിയെ ആദ്യം പീഡിപ്പിച്ചത്.
സംഭവത്തില്‍ ബന്ധമുണ്ടെന്ന് സംശയിക്കുന്ന കോരുത്തോട് സ്വദേശിയായ യുവാവിന് വേണ്ടിയും പൊലിസ് തിരച്ചില്‍ തുടരുകയാണ്. പീഡനത്തിനിരയായ പെണ്‍കുട്ടിയുടെ സുഹൃത്തിനെയും കൗണ്‍സിലിങ്ങിന് വിധേയമാക്കുമെന്ന് പൊലിസ് അറിയിച്ചു.മുണ്ടക്കയം സി.ഐ ഷിബുകുമാറിന്റെ നേതൃത്വത്തില്‍ എസ്. ഐ കെ.ജെ മാമന്‍, സിവില്‍ പൊലിസ് ഓഫിസര്‍മാരായ ജോബി, ടിറ്റോ ജോണ്‍, അനീഷ് എന്നിവരാണ് അന്വേഷണ സംഘത്തിലുള്ളത്.