ആനക്കര: ആത്മീയ പഠനം കാലഘട്ടത്തിന്റെ ആവശ്യമാണെന്ന് സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പറഞ്ഞു. ആനക്കര മഖാം ഉറൂസിന്റെ രണ്ടാം ദിനത്തില്‍ പണ്ഡിത ദര്‍സ് ഉദ്ഘാടനം ചെയ്യുകയായിരുന്നു അദ്ദേഹം. 

ഇസ്്‌ലാമിന്റെ യഥാര്‍ഥ വഴി മനസിലാക്കിയവര്‍ വിരളമാകുകയും ജനങ്ങള്‍ സമാധാനത്തിനായി അത്മീയതയുടെ വഴിതേടുകയും ചെയ്യുന്ന സാഹചര്യത്തില്‍ അത്മീയ പഠനത്തെ കുറിച്ച് ആഴത്തില്‍ മനസിലാക്കാന്‍ പണ്ഡിതന്‍മാര്‍ തയാറാകണം. ഭൗതിക സാഹചര്യങ്ങള്‍ വര്‍ധിച്ചപ്പോള്‍ വിശ്വാസ പ്രമാണങ്ങളില്‍ വ്യതിചലനം വന്നതായും തങ്ങള്‍ പറഞ്ഞു. സമസ്ത ട്രഷറര്‍ സി.കെ.എം.സാദിഖ് മുസ്‌ലിയാര്‍ അധ്യക്ഷനായി. ഉറൂസ് ഇന്ന് സമാപിക്കും
രാവിലെ 10 ന് യൂത്ത് മീറ്റ് നടക്കും. വൈകീട്ട് 6.30 ന് സമാപന സമ്മേളനം പാണക്കാട് സയ്യിദ് ഹൈദര്‍ അലി ശിഹാബ് തങ്ങള്‍ ഉദ്ഘാടനം ചെയ്യും. സമസ്ത സെക്രട്ടറി ആലിക്കുട്ടി മുസ്‌ലിയാര്‍ അധ്യക്ഷതവഹിക്കും. ഇ.ടി.മുഹമ്മദ് ബഷീര്‍ എം.പി വിശിഷ്ടാഥിതിയായിരിക്കും. പാണക്കാട് സയ്യിദ് ഹമീദലി ശിഹാബ് തങ്ങള്‍, അബ്ദു സമദ് പൂക്കോട്ടൂര്‍, സി.കെ.എം.സാദിഖ് മുസ്‌ലിയാര്‍,എം.എം.മുഹ്‌യിദ്ദീന്‍ മുസ്‌ലിയാര്‍ അലുവ പ്രഭാഷണം നടത്തും.