വര്‍ക്കല: പ്രവര്‍ത്തകരില്‍ ആവേശം നിറച്ച് യു.ഡി.എഫ് സ്ഥാനാര്‍ഥി അടൂര്‍ പ്രകാശ് വര്‍ക്കല മേഖലയില്‍ പര്യടനം നടത്തി. രാവിലെ ഒന്‍പതിന് വെട്ടൂര്‍ ഗ്രാമപഞ്ചായത്തിലെ വിളബ് ഭാഗത്തു നിന്നാണ് സ്ഥാനാര്‍ഥി പര്യടനം ആരംഭിച്ചത്. മുന്‍ എം.എല്‍.എ വര്‍ക്കല കഹാര്‍, ഡി.സി.സി പ്രസിഡന്റ് നെയ്യാറ്റിന്‍കര സനല്‍, വെട്ടൂര്‍ ഗ്രാമപഞ്ചായത്ത് പ്രസിഡന്റ് അഡ്വ. അസിം ഹുസൈന്‍, യു.ഡി.എഫ് ചെയര്‍മാന്‍ ബി. ധനപാലന്‍, അഡ്വ. ഇ. റിഹാസ്, സൊണാള്‍ജ് എന്നിവരും സ്ഥാനാര്‍ഥിക്കൊപ്പമുണ്ടായിരുന്നു.
ഉച്ചയക്ക് ഒന്നരയോടെ വിശ്രമത്തിനായി നിര്‍ത്തിവച്ച പര്യടനം വൈകുന്നേരം നാലോടെ പുനരാരംഭിച്ചു. നഗരസഭ പ്രദേശങ്ങള്‍, ഇടവ ഗ്രാമപഞ്ചായത്ത്, ഇലകമണ്‍ പഞ്ചായത്ത് എന്നിവിടങ്ങളിലായി അമ്പതോളം പോയന്റുകളിലാണ് സ്ഥാനാര്‍ഥി സ്വീകരണം ഏറ്റുവാങ്ങിയത്. രാത്രി പത്തോടെ ഇലകമണിലെ മലവിളയിലാണ് ബുധനാഴ്ചത്തെ പര്യടനം സമാപിച്ചത്. നൂറോളം ഇരുചക്ര വാഹനങ്ങളുടെ അകമ്പടിയോടെയാണ് തുറന്ന വാഹനത്തില്‍ യു.ഡി.എഫ് പ്രവര്‍ത്തകര്‍ സ്ഥാനാര്‍ഥിയുമായി പര്യടനം നടത്തിയത്.