തിരുവനന്തപുരം: ആരോഗ്യവകുപ്പ് ജീവനക്കാര്‍ക്ക് ആവശ്യമായ വിശ്രമം അനുവദിക്കാതെയും മറ്റ് ആവശ്യങ്ങളോട് മുഖംതിരിച്ചും അവഗണിക്കുന്നതില്‍ പ്രതിഷേധിച്ച് കേരള ഗവണ്‍മെന്റ് മെഡിക്കല്‍ ഓഫിസേഴ്‌സ് അസോസിയേഷന്‍ ഡോക്ടര്‍മാരുടെ ദിനം സഹനദിനമായി ആചരിച്ചു. സഹനദിനാചരണത്തിന്റെ ഭാഗമായി ഇന്നലെ സര്‍ക്കാര്‍ ഡോക്ടര്‍മാര്‍ ഒരു മണിക്കൂര്‍ അധികം സേവനം നടത്തി. സഹനദിന ബാഡ്ജും കറുത്ത റിബണും ധരിച്ചാണ് ഡോക്ടര്‍മാര്‍ ആശുപത്രികളിലെത്തിയത്. ഡോക്ടേഴ്‌സ് ദിനവുമായി ബന്ധപ്പെട്ട ആദരവുകളും അനുബന്ധ ചടങ്ങുകളും ബഹിഷ്‌കരിക്കുകയും ചെയ്തു.
ആരോഗ്യ വകുപ്പ് ജീവനക്കാര്‍ക്ക് മതിയായ വിശ്രമം ഉറപ്പാക്കുക, അവധി ദിവസങ്ങളില്‍ ജോലി ചെയ്യുന്ന ചാര്‍ജ് മെഡിക്കല്‍ ഓഫിസര്‍മാര്‍ക്ക് പകരം അവധി അനുവദിക്കുക, ആശുപത്രിയ്ക്ക് പുറത്തുള്ള കൊവിഡ് പ്രതിരോധ പ്രവര്‍ത്തനങ്ങള്‍ക്ക് താല്‍ക്കാലിക ജീവനക്കാരെ നിയോഗിക്കുക, ആരോഗ്യ വകുപ്പ് ജീവനക്കാരെ ശമ്പളം തടഞ്ഞു വയ്ക്കലില്‍ നിന്നും ഒഴിവാക്കുക തുടങ്ങിയ ആവശ്യങ്ങളാണ് കെ.ജി.എം.ഒ.എ മുന്നോട്ടുവയ്ക്കുന്നത്. ന്യായമായ ആവശ്യങ്ങള്‍ അവഗണിക്കുന്നത് അപലപനീയമാണെന്നും സര്‍ക്കാര്‍ അനുകൂല നിലപാട് സ്വീകരിക്കുമെന്നാണ് പ്രതീക്ഷിക്കുന്നതെന്നും കെ.ജി.എം.ഒ.എ പ്രസിഡന്റ് ഡോ ജോസഫ് ചാക്കോയും സെക്രട്ടറി ഡോ.ജി.എസ് വിജയകൃഷ്ണനും പറഞ്ഞു.