മുക്കം: ഓണ്‍ലൈനിലൂടെ ജോലി വാഗ്ദാനം ചെയ്തും മറ്റും നടത്തുന്ന തട്ടിപ്പുകള്‍ക്കെതിരെ ജാഗ്രത പാലിക്കണമെന്ന് പൊലിസിന്റെ മുന്നറിയിപ്പ്. ഓണ്‍ലൈന്‍ തൊഴില്‍ത്തട്ടിപ്പുകള്‍ പലതരത്തിലും പലരൂപത്തിലും വ്യാപകമാകുന്ന സാഹചര്യത്തിലാണ് മുന്നറിയിപ്പ് നല്‍കിയത്. വ്യക്തമായ ധാരണയും ജാഗ്രതയുമുണ്ടെങ്കില്‍ ഇത്തരം കെണിയില്‍പ്പെടാതെ രക്ഷനേടാമെന്ന് പൊലിസ് നിര്‍ദേശിക്കുന്നു. ഇമെയില്‍ വഴിയുള്ള ഓഫര്‍ ലെറ്റര്‍ വഴിയാണ് പ്രധാന തട്ടിപ്പ് നടക്കുന്നത്. പ്രമുഖ കമ്പനികളില്‍ വലിയതുക ശമ്പളം വാഗ്ദാനം ചെയ്ത് ഇന്റര്‍വ്യുവിനു ക്ഷണിക്കുകയും യാത്രച്ചെലവ് കമ്പനി വഹിക്കുമെന്നും എന്നാല്‍ ഉറപ്പിനു വേണ്ടി കോഷന്‍ ഡെപ്പോസിറ്റായി നിശ്ചിത തുക താഴെപ്പറയുന്ന ബാങ്ക് അക്കൗണ്ടില്‍ അടയ്ക്കണമെന്നും ഇത് ഇന്റര്‍വ്യുവിന് ശേഷം തിരികെ തരുന്നതായിരിക്കുമെന്നും വ്യക്തമാക്കിയാണ് ഇമെയില്‍ അയക്കുക. സംഭവം സത്യമാണെന്ന് വിശ്വസിച്ച് പലരും ഇവര്‍ പറയുന്ന അക്കൗണ്ടിലേക്ക് പണം നിക്ഷേപിക്കും. ഇത്തരത്തില്‍ വരുന്ന ഇമെയിലുകള്‍ വിശദമായി പരിശോധിച്ചാല്‍ തന്നെ തട്ടിപ്പ് വ്യക്തമാകുമെന്ന് പൊലിസ് പറയുന്നു.