തിരുവനന്തപുരം: കൊവിഡ് പ്രോട്ടോക്കോള്‍ ലംഘിച്ച് പൊതുപരിപാടി സംഘടിപ്പിച്ചതിന് സി.പി.എം എം.എല്‍.എ അഡ്വ. ബി.സത്യനെതിരേ കേസെടുക്കാന്‍ കോടതി നിര്‍ദേശം. 

ആറ്റിങ്ങല്‍ ജുഡീഷ്യല്‍ മജിസ്‌ട്രേറ്റ് കോടതിയാണ് നിര്‍ദേശം നല്‍കിയത്. ആറ്റിങ്ങല്‍ എം.എല്‍.എയായ ബി.സത്യന്‍ കഴിഞ്ഞ മാസം പത്താം തിയതി മണ്ഡലത്തില്‍  കുളം നവീകരണ ഉദ്ഘാടനം നടത്തിയിരുന്നു. 

പരിപാടി കൊവിഡ് പ്രോട്ടോക്കോള്‍ ലംഘിച്ചെന്നു ചൂണ്ടിക്കാട്ടി ലീഡര്‍ സാംസ്‌കാരിക വേദി നല്‍കിയ ഹര്‍ജിയുടെ അടിസ്ഥാനത്തിലാണ് കേസെടുക്കാന്‍ നിര്‍ദേശിച്ചിരിക്കുന്നത്. എം.എല്‍.എക്കു പുറമേ ആറ്റിങ്ങല്‍ നഗരസഭാ ചെയര്‍മാന്‍ സി.ജെ രാജേഷ് കുമാര്‍, വൈസ് ചെയര്‍പേഴ്‌സണ്‍ ആര്‍.എസ് രേഖ തുടങ്ങി പരിപാടിയില്‍ പങ്കെടുത്ത നൂറോളം പേര്‍ക്കെതിരെയാണ് കേസെടുക്കാന്‍ നിര്‍ദേശിച്ചിരിക്കുന്നത്. 

കേരള എപ്പിഡെമിക് ഡിസീസസ് ഓര്‍ഡിനന്‍സ് സെക്ഷന്‍ 4,5 വകുപ്പുകള്‍ പ്രകാരമായിരിക്കും കേസെടുക്കുക.