കായംകുളം: മുഖ്യമന്ത്രിയെയും മന്ത്രിമാരെയും ഡിജിപിയേയും അപകീര്‍ത്തിപ്പെടുത്തും വിധത്തില്‍ അവരുടെ ചിത്രങ്ങള്‍ മോര്‍ഫ് ചെയ്ത് സോഷ്യല്‍ മീഡിയകളില്‍ പ്രസിദ്ധീകരിച്ച സംഭവത്തില്‍ രണ്ട് പേര്‍ക്കെതിരെ കേസ്. മാവേലിക്കര കല്ലുമല സ്വദേശികളും ബി.ജെ.പി പ്രവര്‍ത്തകരുമായ ലിജു കല്ലുമല, രഞ്ജിത് കല്ലുമല എന്നിവര്‍ക്കെതിരാണ് കേസ്.

നാഷണലിസ്റ്റ് യൂത്ത് കോണ്‍ഗ്രസ് (എന്‍.വൈ.സി) സംസ്ഥാന പ്രസിഡന്റ് അഡ്വ. മുജീബ് റഹ്മാന്‍ മാവേലിക്കര പൊലിസ് സര്‍ക്കിള്‍ ഇന്‍സ്പക്ടര്‍ പി. ശ്രീകുമാറിന് നല്‍കിയ പരാതിയെത്തുടര്‍ന്നാണ് ഇവര്‍ക്കെതിരെ കേസ് രജിസ്റ്റര്‍ ചെയ്തത്.

മുഖ്യമന്ത്രിയുടെയും ചില മന്ത്രിമാരുടെയും ഡിജിപിയുടെയും മറ്റും ചിത്രങ്ങള്‍ ചേര്‍ത്ത് വെച്ച ശേഷം മുഖ്യമന്ത്രിയുടെ ചിത്രത്തില്‍ 'ഗുണ്ടയായ അച്ഛന്‍', ധനകാര്യ മന്ത്രി ഡോ.തോമസ് ഐസക്കിന്റെ ചിത്രത്തില്‍' ചിട്ടി കമ്പനി നടത്തി പൊട്ടിയ അമ്മാവന്‍ ', മന്ത്രി മണിയുടെ ചിത്രത്തില്‍ 'കാട്ടുതടി കടത്തി ജയിലില്‍ പോയ ഇളയച്ഛന്‍', ഡി.ജി.പിയുടെ ചിത്രത്തില്‍ 'പൊട്ടന്‍ ആയ ചേട്ടന്‍' എന്നും മറ്റും അടിക്കുറിപ്പ് കൊടുത്തായിരുന്നു ഫെയ്‌സ്ബുക്കില്‍ പ്രസിദ്ധീകരിച്ചത്. കൂടാതെ വൈദ്യുതി മന്ത്രി എം.എം. മണിയുടെ തലയും ചിമ്പാന്‍സിയുടെ ഉടലും ചേര്‍ത്ത് വെച്ച് മോര്‍ഫിങ് വരുത്തിയ ശേഷം അതില്‍ 'ഞാനെന്താ ഇങ്ങനെയായിപ്പോയത്? വല്ല ജനിതകത്തകരാറുമാണോ?' എന്ന അടിക്കുറുപ്പും കൊടുത്ത് പ്രസിദ്ധീകരിക്കുകയും അത് നിരവധി പേര്‍ ഷെയര്‍ ചെയ്യുകയും ചെയ്തിരുന്നു.

് മാവേലിക്കര പൊലിസ് സബ് ഇന്‍സ്പക്ടര്‍ ഐ.പി.സി 500, കെ.പി. ആക്ട് 120 [0] വകുപ്പുകള്‍ പ്രകാരമാണ് ഇവര്‍ക്കെതിരെ കേസെടുത്തത്. പ്രതികള്‍ക്ക് 2 വര്‍ഷം വരെ തടവും പിഴയും ലഭിക്കുന്ന കുറ്റകൃത്യമാണ്. പരാതി വന്ന ശേഷം പ്രതികള്‍ പോസ്റ്റുകള്‍ നശിപ്പിച്ചുവെങ്കിലും പൊലിസ് സ്‌ക്രീന്‍ ഷോട്ടുകള്‍ ശേഖരിച്ചിരുന്നു.