വൈപ്പിന്‍: എളങ്കുന്നപ്പുഴ പഞ്ചായത്തിലെ സൗത്ത് പുതുവൈപ്പില്‍ മാലിന്യങ്ങള്‍ നിക്ഷേപിച്ച് നീര്‍ത്തടങ്ങള്‍ മൂടുന്നതായി പരാതി. 16, 17, 18 വാര്‍ഡുകളിലാണ് മാലിന്യം നിക്ഷേപിച്ച് തോടുകള്‍ നികത്തുന്നത് വ്യാപകമായിരിക്കുന്നത്. ഇതേ തുടര്‍ന്ന് ഈ ഭാഗത്തെ പെയ്ത്ത് വെള്ളം ആര്‍എംപി കനാലിലേക്ക് എത്തിച്ചിരുന്ന ഫിഷറീസ് ലിങ്ക് തോട് ഭാഗീകമായി നികന്നു കഴിഞ്ഞെന്ന് നാട്ടുകാര്‍ പറയുന്നു.
ഇതേ പോലെ സി.ടി.ടി.യു ഓഫിസിനു പിന്നിലുണ്ടായിരുന്ന തോടും മൂടപ്പെട്ടു. യൂനിവേഴ്‌സിറ്റി കവല ഭാഗത്തുള്ള കനാലില്‍ കോഴിവേസ്റ്റുകളും നിക്ഷേപിക്കുന്നുണ്ടത്രേ.
നാട്ടുകാര്‍ പലകുറി പഞ്ചായത്തില്‍ പരാതി നല്‍കിയിട്ടും നടപടിയായില്ലെന്ന് എന്‍.സി.പി എളങ്കുന്നപ്പുഴ മണ്ഡലം പ്രസിഡന്റ് എ.എം നവാസ് ആരോപിച്ചു. നടപടിയില്ലെങ്കില്‍ പഞ്ചായത്തിനു മുന്നില്‍ പ്രക്ഷോഭം തുടങ്ങുമെന്നും ഇദ്ദേഹം മുന്നറിയിപ്പ് നല്‍കി.