അമ്പലവയല്‍: സംസ്ഥാന ഫലമായി ചക്കയെ പ്രഖ്യാപിച്ചതിനു ശേഷമുള്ള ആദ്യ അന്താരാഷ്ട്ര ചക്ക മഹോത്സവത്തിന് അമ്പലവയല്‍ മേഖലാ കാര്‍ഷിക ഗവേഷണ കേന്ദ്രത്തില്‍ തുടക്കമായി.

മേളയുടെ ഔദ്യോഗിക ഉദ്ഘാടനം ഇന്നു രാവിലെ പത്തിനു കൃഷി മന്ത്രി അഡ്വ. വി.എസ് സുനില്‍കുമാര്‍ നിര്‍വഹിക്കും. ഐ.സി ബാലകൃഷ്ണന്‍ എം.എല്‍.എ അധ്യക്ഷനാകും.
കൃഷി വകുപ്പ്, കാര്‍ഷിക സര്‍വകലാശാല, അമ്പലവയല്‍ മേഖലാ കാര്‍ഷിക ഗവേഷണ കേന്ദ്രം എന്നിവയുടെ സംയുക്താഭിമുഖ്യത്തില്‍ സംഘടിപ്പിക്കുന്ന മേളയില്‍ ശാസ്ത്ര സിമ്പോസിയം, ഗോത്ര സമൂഹ സംഗമം, വിവിധ ചക്ക ഇനങ്ങളുടെ പ്രദര്‍ശനം, ചക്ക സംസ്‌കരണത്തില്‍ പരിശീലനം എന്നിവ നടക്കും. ശാസ്ത്ര സിമ്പോസിയത്തില്‍ മലേഷ്യ, ശ്രീലങ്ക, വിയറ്റ്‌നാം തുടങ്ങിയ രാജ്യങ്ങളില്‍നിന്നും ഇന്ത്യയിലെ ഇതര സംസ്ഥാനങ്ങളില്‍നിന്നുമുള്ള പ്രതിനിധികള്‍ പങ്കെടുക്കും. മേള 15നു സമാപിക്കും.
ഉദ്ഘാടന ചടങ്ങില്‍ എം.ഐ ഷാനവാസ് എം.പി മുഖ്യപ്രഭാഷണം നടത്തും. എം.എല്‍.എമാരായ സി.കെ ശശീന്ദ്രന്‍, ഒ.ആര്‍ കേളു, അഡ്വ. കെ. രാജന്‍, കെ. കൃഷ്ണന്‍കുട്ടി, കെ.വി വിജയദാസ്, ജി.എസ് ജയലാല്‍, എം. വിന്‍സന്റ്, ജില്ലാ പഞ്ചായത്ത് പ്രസിഡന്റ് കെ.ബി നസീമ, ജില്ലാ കലക്ടര്‍ എ.ആര്‍ അജയകുമാര്‍, അഗ്രിക്കള്‍ച്ചര്‍ കാര്‍ഷികോല്‍പാദന കമ്മിഷണര്‍ പ്രിന്‍സിപ്പല്‍ സെക്രട്ടറി സുബ്രതാ ബിശ്വാസ്, കെ.എ.യു വൈസ് ചാന്‍സലര്‍ ഡോ. ആര്‍. ചന്ദ്രബാബു തുടങ്ങിയവര്‍ പങ്കെടുക്കും.