കൊല്ലം: ലോക്‌സഭാ തെരഞ്ഞെടുപ്പില്‍ കടുത്ത പോരാട്ടം നടക്കുന്ന കൊല്ലത്ത് മൂന്നു മുന്നണികള്‍ക്കുമെതിരേ സ്വതന്ത്രനായി യുവ ഡോക്ടറും രംഗത്ത്. പ്രമുഖ ന്യൂറോളജിസ്റ്റും കൊല്ലത്ത് സാമൂഹ്യ, ജീവകാരുണ്യ മേഖലകളിലെ ശ്രദ്ധേയ സാന്നിധ്യവുമായ ഡോ. ജെ. ശ്രീകുമാര്‍ സ്വതന്ത്ര ജനകീയവേദിയുടെ പിന്തുണയോടെയാണ് മത്സരരംഗത്തുള്ളത്.
കഴിഞ്ഞ ദിവസം കൊല്ലം ആനന്ദവല്ലീശ്വരം ക്ഷേത്രത്തില്‍ നിന്ന് നൂറുകണക്കിന് പ്രവര്‍ത്തകര്‍ അണിനിരന്ന പ്രകടനത്തോടെയാണ് ശ്രീകുമാര്‍ കലക്ടറേറ്റിലെത്തി, വരണാധികാരി കൂടിയായ ജില്ലാ കലക്ടര്‍ക്ക് നാമനിര്‍ദേശപത്രിക സമര്‍പ്പിച്ചത്. സ്വതന്ത്ര ജനകീയവേദി തെരഞ്ഞെടുപ്പു കമ്മിറ്റി കണ്‍വീനര്‍ വെളിയം സജീം, ഇലക്ഷന്‍ ഏജന്റ് മിഥുന്‍ പ്രകാശ്, തെരഞ്ഞെടുപ്പ് കോ- ഓര്‍ഡിനേറ്റര്‍ മോഹന്‍ കൃഷ്ണന്‍ എന്നിവരും പത്രികാസമര്‍പ്പണ വേളയില്‍ ഒപ്പമുണ്ടായിരുന്നു.